அல்பேனியாவில் நிலவும் ஊழல் மற்றும் கல்விச் செலவினங்களை எதிர்த்துத் தொடர் போராட்டங்களில் ஈடுபட்டு வந்த மாணவர்கள் மற்றும் பொதுமக்கள், அக்டோபர் 14 அன்று மிகப்பெரிய அளவில் திரண்டு போராட்டத்தில் ஈடுபட்டனர். ‘பிளமிங்கோ’ இயக்கத்தின் அழைப்பை ஏற்றுத் திரண்ட ஆயிரக்கணக்கான போராட்டக்காரர்கள் பிரதமர் எடி ராமா பதவி விலகக் கோரி முழக்கங்களை எழுப்பினர். போராட்டத்தின் போது சில குழுவினர் அரசு கட்டிடங்கள் மற்றும் வணிக வங்கிகளை நோக்கிப் பெட்ரோல் குண்டுகளை வீசியதுடன், தீயும் வைத்தனர்.
இதனைக் கட்டுப்படுத்த முயன்ற கலகத் தடுப்புப் காவல்துறையினர் கண்ணீர் புகை குண்டுகள் மற்றும் நீர்தாரைகளைப் பயன்படுத்திக் கூட்டத்தைக் கலைக்க முயன்றனர். இந்த மோதல்களின் போது கல்வீச்சு மற்றும் வன்முறைச் சம்பவங்கள் அரங்கேறியதுடன், கல்வி அமைச்சகத்தின் ஒரு பகுதி மற்றும் சில கட்டிடங்கள் தீயில் கருகின. அமைதியான முறையில் தொடங்கிய இந்தப் போராட்டம் திடீரென வன்முறையாக மாறியதால் அப்பகுதியில் கடுமையான போக்குவரத்து நெரிசலும் பதற்றமான சூழலும் நிலவியது.
வன்முறைச் சம்பவங்கள் தொடர்பாகப் பலரை அல்பேனியக் காவல்துறையினர் கைது செய்து தீவிர விசாரணை நடத்தி வருகின்றனர். இதற்கிடையில், அமைதியான முறையில் போராடும் உரிமைக்கு மதிப்பளிக்க வேண்டும் எனவும், காவல்துறையின் அதிகப்படியான வன்முறைப் பயன்பாடுகள் குறித்து உரிய விசாரணை நடத்தப்பட வேண்டும் எனவும் ஐரோப்பிய ஒன்றிய தூதரகம் தரப்பில் வலியுறுத்தப்பட்டுள்ளது.
வன்முறைச் சம்பவங்களைத் தொடர்ந்து நாட்டின் பல்வேறு பகுதிகளிலும் பாதுகாப்பு பலப்படுத்தப்பட்டுள்ளதுடன், அடுத்தகட்ட அரசியல் நகர்வுகள் குறித்துத் தரப்பினர் தீவிர ஆலோசனைகளில் ஈடுபட்டு வருகின்றனர்
