அந்தமான் தீவுகளை அண்டிய ஆழ்கடல் பகுதியில் மீன்பிடி நடவடிக்கைகளில் ஈடுபட்டுள்ள அனைத்து பலநாள் மீன்பிடி படகுகளையும் அப் பகுதியிலிருந்து உடனடியாக வெளியேறி பாதுகாப்பான கடல் பகுதிகளை நோக்கி பயணிக்குமாறு கடற்றொழில் மற்றும் நீரியல் வளத் திணைக்களம் அறிவித்துள்ளது.
அந்தமான் தீவுகளை அண்டி உருவாகியுள்ள குறைந்த காற்றழுத்த தாழ்வு பகுதி காரணமாக, எதிர்வரும் சில நாட்களில் அக்கடல் பகுதியில் பலத்த காற்றுடன் கூடிய கொந்தளிப்பான கடல் நிலைமை ஏற்படக்கூடும் என அத்திணைக்களம் தெரிவித்துள்ளது.
குறைந்த காற்றழுத்த தாழ்வு பகுதி படிப்படியாக தாழமுக்கமாக வலுவடைந்து இந்தியா நோக்கி நகர்ந்து, இந்தியாவின் கரையை கடக்கும் வாய்ப்பு உள்ளதாக கடற்றொழில் மற்றும் நீரியல் வளத் திணைக்களத்தின் பணிப்பாளர் நாயகம் சுசந்த கஹவத்த குறிப்பிட்டுள்ளார்.
இதன்படி, அந்தமான் மற்றும் வட வங்காள விரிகுடாவை அண்டிய கடல் பகுதியில் உள்ள பலநாள் மீன்பிடி படகுகள் உடனடியாக அக்குறைந்த காற்றழுத்த தாழ்வு பகுதியில் இருந்து விலகி தெற்கு நோக்கி, அதாவது இலங்கை நோக்கி பயணிக்குமாறு அறிவுறுத்தப்பட்டுள்ளது.
இருப்பினும், அப் பகுதியில் மேலும் சில பலநாள் மீன்பிடி படகுகள் மீன்பிடியில் ஈடுபட்டு வருகின்றமை அவதானிக்கப்பட்டுள்ளதாகவும், எதிர்வரும் நாட்களில் ஏற்படக்கூடிய கொந்தளிப்பான கடல் நிலைமை மற்றும் பலத்த காற்று காரணமாக அப்படகுகளுக்கும் அவற்றின் பணியாளர்களுக்கும் ஆபத்துகள் ஏற்படக்கூடும் என்றும் பணிப்பாளர் நாயகம் சுட்டிக்காட்டினார்.
