வடகிழக்கு சூடானின் செங்கடல் (Red Sea) மாநிலத்தில் அமைந்துள்ள ஓனி என்ற தொலைதூரப் பகுதியில் இயங்கி வந்த சட்டவிரோத நிலத்தடித் தங்கச் சுரங்கத்தின் ஒரு பகுதி திடீரெனச் சரிந்து விழுந்ததில், 11 தொழிலாளர்கள் பரிதாபமாக உயிரிழந்தனர். மேலும், இடிபாடுகளுக்குள் சிக்கி 30-க்கும் மேற்பட்டோர் படுகாயமடைந்துள்ள நிலையில், இடிபாடுகளுக்குள் மேலும் சிலர் சிக்கியிருக்கலாம் என்ற அச்சத்தில் மீட்புப் படையினர் மற்றும் உள்ளூர் மக்கள் தீவிரத் தேடுதல் பணியில் ஈடுபட்டு வருகின்றனர்.
கடந்த சனிக்கிழமை இரவு சுரங்கப் பாதையில் பணி நடந்துகொண்டிருந்த போது இந்த எதிர்பாராத விபத்து நிகழ்ந்ததாகக் கூறப்படுகிறது. அரசுக்குச் சொந்தமான சுடானீஸ் மினரல் ரிசோர்சஸ் நிறுவனத்தின் மூத்த அதிகாரி ஒருவர் தெரிவிக்கையில், ஞாயிற்றுக்கிழமை மாலை வரை 11 உடல்கள் மீட்கப்பட்டுள்ளதாகவும், 30 பேர் மீட்கப்பட்டு மருத்துவமனைகளில் சிகிச்சைக்காக அனுமதிக்கப்பட்டுள்ளதாகவும் உறுதிப்படுத்தியுள்ளார்.
சூடானில் ஒரே வாரத்திற்குள் நடைபெறும் இரண்டாவது மிகப்பெரிய தங்கச் சுரங்க விபத்து இதுவாகும். முன்னதாக, அந்நாட்டின் மேற்குப் பகுதியில் உள்ள மற்றொரு முறைசாராத் தங்கச் சுரங்கத்தில் அடுத்தடுத்து நடந்த சரிவுகளில் 82-க்கும் மேற்பட்ட தொழிலாளர்கள் பரிதாபமாக உயிரிழந்தது குறிப்பிடத்தக்கது. சூடானில் போதிய பாதுகாப்பு வழிகாட்டுதல்கள் பின்பற்றப்படாத ஆயிரக்கணக்கான முறைசாராத் தங்கச் சுரங்கங்கள் இயங்கி வருவது தொடர் விபத்துகளுக்கு முதன்மைச் காரணியாக உள்ளது.
கடந்த 2023-ஆம் ஆண்டு ஏப்ரல் மாதம் முதல் சூடான் ராணுவத்திற்கும், ஆர்.எஸ்.எஃப் என்ற துணை ராணுவப் படைக்கும் இடையே நீடித்து வரும் தீவிர உள்நாட்டுப் போரின் காரணமாக, அந்நாட்டின் அத்தியாவசியப் பாதுகாப்பு நெறிமுறைகள் முற்றிலும் சீர்குலைந்துள்ளன. பலவீனமான கண்காணிப்பு மற்றும் தீவிரப் போர்ப் பின்னணியில், பொதுமக்கள் வாழ்வாதாரத்திற்காக இதுபோன்ற ஆபத்தான முறைசாரா தங்கச் சுரங்கப் பணிகளில் ஈடுபட்டு உயிரை விடுவது சர்வதேச அளவில் சோகத்தை ஏற்படுத்தியுள்ளது.
