
தெற்கு நைஜீரியாவின் பயெல்சா மாகாணத்தில் இறுதிச் சடங்கில் பங்கேற்கப் பயணிகளை ஏற்றிச் சென்ற படகு கவிழ்ந்த விபத்தில் குறைந்தது 24 பேர் உயிரிழந்துள்ளதாகத் தேசிய அவசரகால மேலாண்மை முகமை (NEMA) தெரிவித்துள்ளது. சதன் இஜாவ் மாவட்டத்தில் உள்ள ஓவெய்கோரோகா மற்றும் ஓடுவான் பகுதிகளுக்கு இடையிலான ஆற்றுச் சந்திப்பில் கடந்த வெள்ளிக்கிழமை (நவம்பர் 20) இந்தச் சம்பவம் நிகழ்ந்தது.
முதற்கட்டமாக வெள்ளிக்கிழமை நான்கு உடல்கள் மீட்கப்பட்ட நிலையில், சனிக்கிழமை மேலும் உடல்கள் மீட்கப்பட்டதைத் தொடர்ந்து பலி எண்ணிக்கை 24 ஆக உயர்ந்துள்ளதுடன், 24 பேர் உயிருடன் மீட்கப்பட்டுள்ளனர். படகில் ஏற்பட்ட இயந்திரக் கோளாறு முதற்கட்ட விசாரணையில் தெரியவந்துள்ள நிலையில், படகைக் கரையை நோக்கிச் செலுத்துமாறு பயணிகள் கூறியதை ஓட்டுநர் ஏற்கவில்லை எனப் பயெல்சா காவல்துறை செய்தித் தொடர்பாளர் மூசா முகமது தெரிவித்துள்ளார். சம்பவத்திற்குப் பிறகு படகு ஓட்டுநர் தப்பி ஓடியதாகவும், படகின் மேலாளர் காவலில் வைக்கப்பட்டுள்ளதாகவும் அதிகாரிகள் கூறியுள்ளனர்.
இந்த விபத்தில் உயிரிழந்தவர்களுக்கு இரங்கல் தெரிவித்துள்ள நைஜீரிய அதிபர் போலா டினுபு இந்தத் துயரத்தில் உயிரிழந்தவர்கள் இவ்வாறு இறந்திருக்கக் கூடாது என்று அறிக்கை வெளியிட்டுள்ளார். மேலும், பயெல்சா மாகாண தகவல் ஆணையர் எபியுவோ கோகு-ஓபியாய் வெளியிட்ட அறிக்கையில், படகு ஓட்டுநர்கள் மற்றும் பயணிகள் பாதுகாப்பு விதிகளைப் பின்பற்ற வேண்டும் என்றும், எந்தப் பயணமும் உயிரை விடப் பெரிதல்ல என்றும் வலியுறுத்தியுள்ளார்.
மீட்கப்பட்டவர்களில் 19 பேருக்கு உள்ளூர் மருத்துவமனையிலும், 5 பேருக்கு மாகாணத் தலைநகரில் உள்ள மருத்துவமனையிலும் சிகிச்சை அளிக்கப்பட்டு வருகிறது. காணாமல் போனவர்களின் எண்ணிக்கை குறித்த முழு விவரம் இன்னும் வெளியிடப்படாத நிலையில், உள்ளூர் நீச்சல் வீரர்கள் மற்றும் மீட்புக் குழுவினருடன் இணைந்து தேடுதல் பணிகள் தொடர்ந்து நடைபெற்று வருகின்றன.



