சினிமாவை வெறும் தொழிலாகப் பார்க்காமல், வாழ்நாள் முழுவதும் கலைக்கான அர்ப்பணிப்புடன் பயணித்தவர் நடிகர் திலகம் சிவாஜி கணேசன். அவர் திரையில் ஏற்ற கதாபாத்திரங்களின் உடல் மொழி, முகபாவனை, வசன உச்சரிப்பு என அனைத்துமே தனித்துவமானவை. அதனால்தான் அவரது நடிப்புக்கு நிகராக மற்றொருவரை ஒப்பிடுவது இன்றளவும் சவாலானதாகவே பார்க்கப்படுகிறது. அப்படிப்பட்ட மகா கலைஞர்,
ஒரு திரைப்படத்தில் சம்பளம் வாங்காமல் நடித்துக் கொடுத்த சம்பவம் குறித்த தகவல் பலருக்கும் தெரியாமல் இருக்கலாம். அந்தப் படம் 1969ஆம் ஆண்டு வெளியான ‘காவல் தெய்வம்’.
எழுத்தாளர் ஜெயகாந்தன் எழுதிய ‘கை விலங்கு’ என்ற படைப்பை அடிப்படையாகக் கொண்டு ‘காவல் தெய்வம்’ திரைப்படம் உருவானது. நடிகரும் தயாரிப்பாளருமான எஸ்.வி. சுப்பையா இப்படத்தை தயாரித்தார். இந்தப் படத்தில் சிவாஜி கணேசன் சிறப்பு தோற்றத்தில் நடித்திருந்தார். அவருக்கு ஜோடியாக மனோரமா நடித்திருந்தார். சிவாஜி கணேசன் மற்றும் மனோரமா இணைந்து நடித்த குறிப்பிடத்தக்க படங்களில் இதுவும் ஒன்றாகும்.
படத்தில் சிவாஜி கணேசனை நடிக்க வைக்க வேண்டும் என்று எஸ்.வி. சுப்பையா விரும்பியிருந்தாலும், அவரிடம் நேரடியாகக் கேட்கத் தயங்கியதாக கூறப்படுகிறது. இதையடுத்து ஏ.வி.எம். சரவணன் மூலம் சிவாஜியை அணுகியிருக்கிறார். எஸ்.வி. சுப்பையா தயாரிப்பில் ஜெயகாந்தனின் படைப்பை திரைப்படமாக உருவாக்குவதாகவும், அதில் ஒரு முக்கியமான கதாபாத்திரத்தில் நடிக்க வேண்டும் என்றும் சிவாஜியிடம் ஏ.வி.எம். சரவணன் கேட்டதாக தகவல். இதற்கு சிவாஜி முதலில், “இந்தப் படத்தை முழுமையாக எஸ்.வி. சுப்பையாதான் தயாரிக்கிறாரா?” என்று கேட்டுள்ளார். அதற்கு ஆம் என்று பதில் கிடைத்ததும், அவர் உடனடியாக சம்மதித்ததாக கூறப்படுகிறது.
எஸ்.வி. சுப்பையா தனது நண்பர் மட்டுமல்லாமல், தன்னுடன் திரைத்துறையில் பயணித்த சக நடிகர் என்பதால், அவருடைய சொந்த தயாரிப்பில் உருவாகும் படத்தில் நடித்ததற்காக சம்பளம் பெறுவது சரியாக இருக்காது என்று சிவாஜி கருதியுள்ளார். அதனால், “அவர் தயாரிக்கும் படத்தில் நான் நடிக்கிறேன். ஆனால் அதற்காக எந்த சம்பளமும் வாங்க மாட்டேன்” என்று சிவாஜி தெரிவித்ததாக கூறப்படுகிறது. அதன்படியே படப்பிடிப்பில் கலந்து கொண்டு தனது கதாபாத்திரத்தை முடித்துக் கொடுத்துள்ளார்.
ஆனால் சிவாஜி கணேசனுக்கு ஏதாவது கொடுக்க வேண்டும் என்று எஸ்.வி. சுப்பையா நினைத்ததாராம். நேரடியாக பணத்தை வழங்கினால் சிவாஜி ஏற்றுக்கொள்ள மாட்டார் என்பதை அறிந்த அவர், ஒரு வித்தியாசமான வழியைத் தேர்ந்தெடுத்துள்ளார். ஒரு டிபன் கேரியரில் மேல்பகுதிகளில் உணவை வைத்து, கீழே உள்ள பாத்திரத்தில் ரூ.15,000 பணத்தை வைத்துள்ளார். பின்னர், “இதில் சாப்பாடு இருக்கிறது, நீங்கள் சாப்பிட வேண்டும்” என்று கூறி அந்த டிபன் கேரியரை சிவாஜியிடம் கொடுத்ததாக சொல்லப்படுகிறது. சிவாஜி அதைத் திறந்து பார்த்தபோது, உணவுப் பாத்திரங்களுக்குக் கீழே பணம் இருப்பதை கண்டுபிடித்துள்ளார்.
பணத்தைப் பார்த்ததும் சிவாஜி கணேசன் அதிருப்தியடைந்ததாக கூறப்படுகிறது. உடனடியாக எஸ்.வி. சுப்பையாவை அழைத்து, தான் ஏற்கனவே சம்பளம் வாங்காமல் நடிப்பதாகக் கூறியிருந்த நிலையில், இப்போது பணம் கொடுப்பது ஏன் என்று கேட்டுள்ளார். தனது முடிவில் உறுதியாக இருந்த சிவாஜி, அந்த ரூ.15,000 பணத்தையும் எஸ்.வி. சுப்பையாவிடமே திருப்பிக் கொடுத்ததாக கூறப்படுகிறது.
நடிகராக உயர்ந்த இடத்தைப் பிடித்திருந்த காலத்திலும், நண்பருக்காக சம்பளம் வாங்காமல் நடித்ததுடன், மறைமுகமாக வழங்கப்பட்ட பணத்தையும் ஏற்க மறுத்த இந்த சம்பவம் சிவாஜி கணேசனின் கலை மீதான அர்ப்பணிப்பையும், சக கலைஞர்கள் மீதான நட்பையும் வெளிப்படுத்தும் ஒரு சுவாரஸ்யமான திரைப்பின்னணி சம்பவமாக பார்க்கப்படுகிறது.
