அரசியலில் தொடர்ச்சியான தோல்விகள் ஒரு தலைவரின் பயணத்தை முடிவுக்குக் கொண்டு செல்ல வேண்டிய அவசியமில்லை என்பதை கெய்கோ புஜிமோரி மீண்டும் நிரூபித்துள்ளார். பல ஆண்டுகளாக நீடித்த அரசியல் நெருக்கடிகள், பாதுகாப்புச் சவால்கள் மற்றும் பொருளாதார சரிவை எதிர்கொண்டு வரும் பெருவில், புதிய ஆட்சியிடம் மக்கள் பெரிய எதிர்பார்ப்பை வைத்துள்ளனர். குற்றக் கும்பல்களை கட்டுப்படுத்துவது முதல் பொருளாதாரத்தை மீட்டெடுப்பது வரை பல சவால்களுடன் கெய்கோவின் ஆட்சி தொடங்கியுள்ள நிலையில், அவரது நிர்வாகம் பெருவின் அரசியல் எதிர்காலத்தை எந்த திசையில் கொண்டு செல்லும் என்பது உலக நாடுகளின் கவனத்தையும் ஈர்த்துள்ளது.
தென் அமெரிக்க நாடான பெருவின் அரசியல் வரலாற்றில் முக்கியமான திருப்பமாக, கெய்கோ புஜிமோரி மக்களால் நேரடியாகத் தேர்ந்தெடுக்கப்பட்ட முதல் பெண் அதிபராக பதவியேற்றுள்ளார். பல ஆண்டுகளாக அரசியல் போராட்டங்கள், தேர்தல் தோல்விகள் மற்றும் கடுமையான விமர்சனங்களை எதிர்கொண்ட அவர், இறுதியில் நான்காவது முயற்சியில் வெற்றி பெற்று பெருவின் அரசியல் வரலாற்றில் புதிய அத்தியாயத்தை எழுதியுள்ளார்.
தொடர்ச்சியான தோல்விகளுக்குப் பிறகு கிடைத்த வெற்றி
கெய்கோ புஜிமோரி இதற்கு முன்பு 2011, 2016 மற்றும் 2021 ஆம் ஆண்டுகளில் நடைபெற்ற அதிபர் தேர்தல்களில் போட்டியிட்டு தோல்வியடைந்திருந்தார். இருப்பினும், அரசியல் களத்தை விட்டு விலகாமல் தொடர்ந்து மக்களிடம் ஆதரவைப் பெற முயற்சித்தார். அண்மையில்நடைபெற்ற தேர்தலின் இறுதிச்சுற்றில் தனது எதிரணி வேட்பாளரை சுமார் 50 ஆயிரம் வாக்குகள் வித்தியாசத்தில் தோற்கடித்து வெற்றிபெற்றார். இந்த வெற்றியின் மூலம், பெருவில் மக்களால் நேரடியாகத் தேர்ந்தெடுக்கப்பட்ட முதல் பெண் அதிபர் என்ற வரலாற்றுப் பெருமையையும் அவர் பெற்றுள்ளார்.
குற்றக் கும்பல்களை ஒடுக்குவதே முதல் முன்னுரிமை
பதவியேற்ற உடனேயே நாட்டில் அதிகரித்து வரும் குற்றக் கும்பல்களை கட்டுப்படுத்துவது தனது அரசின் முதல் இலக்கு என்று கெய்கோ புஜிமோரி அறிவித்துள்ளார். சட்டம்-ஒழுங்கை வலுப்படுத்தவும், பொதுமக்களின் பாதுகாப்பை உறுதி செய்யவும் கடுமையான நடவடிக்கைகள் மேற்கொள்ளப்படும் என்றும் அவர் தெரிவித்துள்ளார். நாட்டில் நீண்டகாலமாக நிலவி வரும் பாதுகாப்பு சவால்களை சமாளிப்பதில் தனது அரசு உறுதியுடன் செயல்படும் எனவும் கூறியுள்ளார்.
பொருளாதார மீட்புக்கு புதிய அணுகுமுறை
புதிய பொருளாதார அமைச்சராக எல்மர் கியூபாவை நியமித்துள்ள கெய்கோ, பொருளாதார வீழ்ச்சியிலிருந்து நாட்டை மீட்டெடுப்பதே அரசின் அடுத்த முக்கிய நோக்கம் என தெரிவித்துள்ளார். முதலீடுகளைஅதிகரித்தல், வேலைவாய்ப்புகளை உருவாக்குதல் மற்றும் பொருளாதார வளர்ச்சியை மீண்டும் வேகப்படுத்துதல் ஆகியவை அரசின் முன்னுரிமை திட்டங்களாக இருக்கும் என எதிர்பார்க்கப்படுகிறது.
சர்வதேச பாதுகாப்பு ஒத்துழைப்புக்கு முக்கியத்துவம்
அமெரிக்க அதிபர் டொனால்ட் டிரம்ப் முன்வைத்துள்ள “Shield of the Americas” பாதுகாப்பு அமைப்புடன் இணைந்து செயல்பட பெரு அரசு முன்னுரிமை அளிக்கும் என்றும் கெய்கோ புஜிமோரி அறிவித்துள்ளார். பிராந்திய பாதுகாப்பு, எல்லைப் பாதுகாப்பு மற்றும் சர்வதேச ஒத்துழைப்பை வலுப்படுத்தும் முயற்சிகளிலும் தனது அரசு கவனம் செலுத்தும் என அவர் தெரிவித்துள்ளார்.
அரசியல் நெருக்கடியிலிருந்து மீளுமா பெரு?
கடந்த பத்து ஆண்டுகளுக்கும் மேலாக பெருவில் அரசியல் நிலையற்ற சூழல் நீடித்து வருகிறது. அதிபர்கள் மீது தொடரப்பட்ட ஊழல் வழக்குகள், அரசியல் மோதல்கள், நாடாளுமன்ற கலைப்புகள் மற்றும் ஆட்சி மாற்றங்கள் காரணமாக 2016 முதல் பதவியேற்ற எந்த அதிபரும்முழுமையான ஐந்தாண்டு பதவிக்காலத்தை நிறைவு செய்ய முடியாத நிலை ஏற்பட்டுள்ளது. இந்நிலையில், கெய்கோ புஜிமோரியின் தலைமையில் புதிய அரசு அரசியல் நிலைத்தன்மையை ஏற்படுத்துமா, பொருளாதாரத்தை மீட்டெடுக்குமா, சட்டம்-ஒழுங்கை வலுப்படுத்துமா என்ற எதிர்பார்ப்பு பெருவில் மட்டுமல்லாமல் சர்வதேச அளவிலும் எழுந்துள்ளது. அவரது ஆட்சியின் தொடக்க முடிவுகள், பெருவின் அடுத்தகட்ட அரசியல் மற்றும் பொருளாதார திசையை தீர்மானிக்கும் முக்கிய அம்சமாக பார்க்கப்படுகின்றன.
