இந்தியாவின் ரஃபேல் போர் விமானங்களைச் சமாளிக்கும் வகையில் சீனாவிடமிருந்து புதிய போர் விமானங்களை பாகிஸ்தான் வாங்கியுள்ளது.

 

 

இந்தியாவின் ரஃபேல் போர் விமானங்களை சமாளிக்கும் வகையில், சீனாவிடமிருந்து ஜே 10சி ரக போர் விமானங்களை வாங்கியுள்ளது பாகிஸ்தான். 25 போர் விமானங்களை பாகிஸ்தான் வாங்கியுள்ளதாம். இத்தகவலை பாகிஸ்தான் உள்துறை அமைச்சர் ஷேக் ரஷீத் அகமது கூறியுள்ளார்.

 

ராவல்பிண்டியில் செய்தியாளர்களிடம் அவர் பேசுகையில், 25 ஜே 10சி போர் விமானங்களை சீனாவிடமிருந்து வாங்கியுள்ளோம். அடுத்த ஆண்டு மார்ச் 23ம் தேதி நடைபெறும் பாகிஸ்தான் தின விழாவின்போது இந்த விமானங்கள் அணிவகுத்து வரும் என்றார் அவர்.

 

அமைச்சர் ஷேக் ரஷீத் செய்தியாளர்களிடம் பேசும்போது போர்விமானத்தின் பெயர் கூட தெரியாமல் தப்புத் தப்பாக பேசினார். அதாவது ஜே 10 சி என்று சொல்வதற்குப் பதில் ஜேஎஸ் 10 என்று உச்சரித்தார். செய்தியாளர்கள் அவரிடம் திரும்பத் திரும்பக் கேட்ட பிறகுதான் தான் தவறாக பேசி வருவதை அவர் உணர்ந்தார். பிறகு அதை சரி செய்து கொண்டார். என்ன விமானம் கூட வாங்குகிறோம் என்று தெரியாமல் பாகிஸ்தான் அமைச்சர் இப்படி செய்தியாளர்கள் மூலமாக நாட்டு மக்களிடம் அம்பலப்படுள்ளார்.

 

 

கடந்த ஆண்டு பாகிஸ்தான் - சீனா இணைந்து நடத்திய கூட்டு ராணுவப் பயிற்சியின்போது ஜே 10சி போர் விமானங்களும் கலந்து கொண்டன. இந்த நிலையில் அவற்றை தற்போது பாகிஸ்தான் வாங்கியுள்ளது.

 

 

 

பாகிஸ்தானிடம் ஏற்கனவே அமெரிக்க தயாரிப்பான எப் 16 போர் விமானங்கள் உள்ளன. ஆனால் ரஃபேலுக்கு முன்பு அவை போணியாகாது என்பதால் அவசரம் அவசரமாக சீனாவை நாடி அங்கிருந்து இந்த ஜே 10சி போர் விமானங்களை அது வாங்கியுள்ளது.

 

ஐந்து ஆண்டுகளுக்கு முன்புதான் பிரான்சிடமிருந்து 36 ரஃபேல் போர் விமானங்களை வாங்கும் ஒப்பந்தத்தை இந்தியா போட்டது என்பது நினைவிருக்கலாம். அதுதொடர்பாக பெரும் சர்ச்சையும் கூட இந்தியாவில் வெடித்தது என்பது குறிப்பிடத்தக்கது.