ஸ்பெயினின், Palma de Mallorca விமான நிலையத்தில் விமானம் ஒன்று அவசரமாகத் தரையிறங்கியுள்ளது.

 

 

விமானம் மொரோக்கோவுக்கும் துருக்கிக்கும் இடையில் சென்றுகொண்டிருந்தபோது திடீரெனத் தரையிறங்கியதாகத் தெரிவிக்கப்பட்டது.

 

நோயுற்ற பயணி ஒருவருக்கு அவசரமாகச் சிகிச்சையளிப்பதற்காக அது ஸ்பெயினில் தரையிறங்கியதாகக் கூறப்பட்டது.

 

அவரை வெளியே அழைத்துச் சென்றபோது விமானத்திலிருந்து மேலும் சுமார் 20 பயணிகள் திடீரெனப் பதறியடித்து வெளியேறினர்.

 

அவ்வாறு செய்தவர்களில் இருவர் கைதுசெய்யப்பட்டனர்.

 

மருத்துவ அவசரம் என்று பயணி கூறியது பொய் என்று அதிகாரிகள் நம்புகின்றனர்.

 

பொய்யான அத்தகைய ஒரு சூழலை உருவாக்கி சட்டவிரோதமாக ஸ்பெயினுக்குள் நுழையும் திட்டத்தில் சிலர் இருந்திருக்கலாம் என்று சந்தேகிக்கப்படுகிறது.

 

மருத்துவ உதவி தேவை என்று குறிப்பிட்ட அந்தப் பயணிக்கு உடலில் எந்தக் கோளாறும் இல்லை என்பதை அவர் அனுப்பப்பட்ட மருத்துவமனை உறுதிசெய்தது.

 

சட்டவிரோதக் குடிநுழைவுக்காகச் சிலருக்கு அவர் உதவியிருக்கலாம் என்று நம்பப்படுகிறது. பின்னர் அவர் கைது செய்யப்பட்டார்.

 

அவருடன் மருத்துவமனைக்குச் சென்ற மற்றொரு பயணியும் காணாமற்போனதாகக் கூறப்படுகிறது.