ஆப்கானிஸ்தானில் இருவேறு இடங்களில் நடந்த கார்க் குண்டு தாக்குதலில் 8 பேர் உயிரிழந்துள்ளதாக சர்வதேச செய்திகள் தெரிவிக்கின்றன.

 

தலைநகர் காபூலில் குடியிருப்புப் பகுதியில் வீதியோரம் நிறுத்தப்பட்டிருந்த கார் வெடித்து சிதறியதில் பொதுமக்கள் 3 பேர் உயிரிழந்தனர்.

 

இந்த வெடிகுண்டு தாக்குதலில் சுமார் 100 முதல் 200 மீட்டர் சுற்றுவட்டாரத்துக்குள் இருந்து வீடுகளின் ஜன்னல் உடைந்து சேதமாகின என கூறப்பட்டுள்ளது.

 

இதேவேளை கோஸ்ட் மாகாணத்தில் பொலிஸ் படைதளத்தில் நடந்த மற்றொரு வெடிகுண்டு தாக்குதலில் 5 பொலிஸார் உயிரிழந்ததோடு 30க்கும் மேற்பட்டோர் படுகாயமடைந்தனர்.

 

இந்த ஆண்டின் முதல் ஒன்பது மாதங்களில் ஏறக்குறைய 6,000 ஆப்கானிய பொதுமக்கள் கொல்லப்பட்டனர் அல்லது காயமடைந்தனர் என ஐக்கிய நாடுகள் சபை தெரிவித்துள்ளது.

 

அரசாங்கப் படைகளுக்கும் தலிபான் போராளிகளுக்கும் இடையிலான மோதலை முடிவுக்கு கொண்டுவருவதற்கான முயற்சிகள் இடம்பெற்ற போதிலும் அப்பகுதியில் மீண்டும் மோதல்கள் தலைதூக்கியுள்ளன.