கொரோனா வைரஸ் தொற்றுக்கு இலக்கான 124 பேர் குணமடைந்துள்ளதாக சர்வதேச ஊடகங்கள் செய்தி வெளியிட்டுள்ளன.
குறித்த வைரஸ் தொற்றால் பாதிப்படைந்த நோயாளர்கள் வெற்றிகரமாக சிகிச்சை பெற்று வைத்தியசாலைகளில் இருந்து வெளியேறியுள்ளதாக தெரிவிக்கப்படுகின்றது.
சீனாவின் வுஹான் நகரில் இருந்தே குறித்த வைரஸ் பரவியதாக தெரிவிக்கப்படும் நிலையில், தற்போது அங்கு 124 பேர் குணமடைந்துள்ளதாக குறிப்பிடப்படுகின்றது.
சீனாவில் நோய் தொற்றுக்கு இலக்கான 4 ஆவது மற்றும் 5 ஆவது நோயாளர்கள் இருவரும் இவ்வாறு குணமடைந்துள்ளனர். அத்துடன், குறித்த இருவரும் நிமோனியா காய்ச்சலால் பீடிக்கப்பட்டிருந்தமை கண்டறியப்பட்டுள்ளது.
எவ்வாறாயினும் தத்தமது வீடுகளுக்கு திரும்பியுள்ள இவர்கள் தொடர்ந்தும் வைத்திய கண்காணிப்பில் உள்ளதாகவும் சர்வதேச ஊடகங்கள் செய்தி வெளியிட்டுள்ளன.
இதேவேளை, கொரோனா வைரஸின் தாக்கம் காரணமாக இதுவரை சீனாவில் 9 ஆயிரத்து 692 பேர் பாதிக்கப்பட்டுள்ளதுடன், 213 பேர் உயிரிழந்துள்ளனர்.
அத்துடன், கொரோனா வைரஸின் தாக்கம் காரணமாக உலக 23 நாடுகளைச் சேர்ந்த 9,821 பேர் பாதிக்கப்பட்டுள்ளனர்.
நேற்றைய தினம் மொத்தமாக 21 நாடுகளைச் சேர்ந்த 7 ஆயிரத்து 184 பேர் கொரோனாவின் தாக்கத்துக்கு உள்ளாகியிருந்த நிலையில், சீனாவில் உயிரிழப்பானது 170 ஆக காணப்பட்டது என்பது குறிப்பிடத்தக்கது.