சீனாவின் நாணயமான யுவானின் உலகளாவிய பயன்பாட்டை விரிவுபடுத்தவும், அதை ஒரு சர்வதேச இருப்பு நிலைக்கு உயர்த்தி ஒரு "வலுவான நாணயமாக" உருவாக்க வேண்டும் என்று சீன அதிபர் ஜி ஜின்பிங் வலியுறுத்தியுள்ளார். இது அமெரிக்க டாலருக்கு விடுக்கப்படுட்ட ஒரு சவாலாக கருதப்படுகிறது. அமெரிக்காவிற்குப் பிறகு உலகின் இரண்டாவது பெரிய பொருளாதாரமான சீனா, அமெரிக்க டாலரைச் சார்ந்திருப்பதைக் குறைக்க சர்வதேச வர்த்தகத்தில் யுவானின் பயன்பாட்டை துரிதப்படுத்தி வருகிறது. கடந்த ஆண்டு, அதன் 6.2 டிரில்லியன் அமெரிக்க டாலர் வெளிநாட்டு வர்த்தகத்தில் சுமார் மூன்றில் ஒரு பங்கை உள்ளூர் நாணயத்தை பயன்படுத்தியுள்ளது.

 

இது தொடர்பாக சீன நாளிதழ் வெளியிட்டுள்ள கட்டூரையில்; சர்வதேச வர்த்தகம், முதலீடு மற்றும் அந்நிய செலாவணி சந்தைகளில் பரவலாகப் பயன்படுத்தக்கூடிய ஒரு வலுவான நாணயத்தை சீனா உருவாக்க வேண்டும் என்றும், உலகளாவிய இருப்பு நிலையை அடைய வேண்டும் என்றும் சீன அதிபர் ஜி ஜின்பிங் கூறினார்.

 

2012 இல் ஆட்சிக்கு வந்ததிலிருந்து, டாலருக்குப் போட்டியாக யுவான் (RMB) ஒரு சர்வதேச நாணயமாக மாற வேண்டும் என்று சீன அதிபர் கடுமையாக வலியுறுத்தி வருகிறார். வங்கி சொத்துக்கள், அந்நிய செலாவணி இருப்பு மற்றும் மூலதன சந்தை அளவு ஆகியவற்றின் அடிப்படையில் சீனா உலகின் மிகப்பெரிய பொருளாதாரங்களில் ஒன்றாக இருந்தாலும், வலுவாக இல்லை. நிதி அதிகார மையத்தை உருவாக்குவது நீண்டகால பணியாக இருக்கும் என்று ஜி ஜின்பிங் கூறியுள்ளார்.

 

ரஷ்ய எண்ணெய் மற்றும் எரிவாயுவை அதிகம் வாங்கும் சீனா, ரஷ்யாவுடனான இருதரப்பு வர்த்தகத்தில் யுவானின் பயன்பாட்டை விரிவுபடுத்தியுள்ளது. உள்ளூர் நாணயங்களில் வர்த்தகத்தை எளிதாக்குவதற்காக சீனா ஏற்கனவே சுமார் 50 நாடுகளுடன் நாணய மாற்று ஒப்பந்தங்களை ஏற்படுத்தியுள்ளதாக தகவல்கள் தெரிவிக்கின்றன. கடந்த ஆண்டில், டாலருக்கு எதிராக யுவான் பொதுவாக வலுப்பெற்றுள்ளது, இருப்பினும் சர்வதேச முதலீட்டு வங்கிகள் அதன் நீண்டகால நியாயமான மதிப்புக்குக் கீழே இருப்பதாகக் கூறுகின்றன.