அமெரிக்க குடியுரிமை பெறாதவர்களுக்கு வழங்கப்படும் அனைத்து மத்திய அரசின் நன்மைகள் மற்றும் மானியங்கள் நிறுத்தப்படும் என்றும் ட்ரம்ப் அறிவித்துள்ளார்.

 

மூன்றாம் உலக நாடுகள் என்று குறிப்பிடப்படும் நாடுகளில் இருந்து அமெரிக்காவில் குடியேறுபவர்களுக்கு நிரந்திரத் தடை விதித்து அதிபர் டிரம்ப் உத்தரவிட்டுள்ளார். சில நாடுகளில் இருந்து வரும் கிரீன் கார்டு விண்ணப்பங்களை முழுமையாக மறுபரிசீலனை செய்யவும் அவர் உத்தரவிட்டுள்ளார்.

 

அமெரிக்காவின் வாஷிங்டன் டி.சி.யில் உள்ள வெள்ளை மாளிகையில், தேசிய காவல்படை உறுப்பினர்களான சிறப்பு நிபுணர் சாரா பெக்ஸ்ட்ரோம், ஸ்டாஃப் சார்ஜென்ட் ஆண்ட்ரூ வுல்ஃப் ஆகியோர் பாதுகாப்புப் பணியில் இருந்தனர். அப்போது அங்கு வந்த ஒருவர் பாதுகாப்புப் பணியில் இருந்த காவலர்களைத் துப்பாக்கியால் சுட்டதாகக் கூறப்படுகிறது. இந்தச் சம்பவத்தில் இரு பாதுகாப்பு வீரர்களும் கடுமையாகக் காயமடைந்தனர்.

 

அவர்களுக்குத் தீவிர சிகிச்சையளிக்கப்பட்ட நிலையில், சாரா பெக்ஸ்ட்ரோம் வியாழக்கிழமை இரவு உயிரிழந்தார். இந்த நிலையில், வெள்ளை மாளிகை அருகில் துப்பாக்கிச் சூடு நடத்தியவரைக் காவல்துறையினர் கைது செய்து சிறையில் அடைத்துள்ளனர். ஆப்கானைச் சேர்ந்த ரஹ்மனுல்லா லக்வாள் என்ற 29 வயது இளைஞர் தான் துப்பாக்கிச் சூடு நடத்தியதாக அதிபர் டிரம்ப் கூறியுள்ளார். 2021- ஆம் ஆண்டு, அமெரிக்கப் படைகள் ஆப்கானிஸ்தானில் இருந்து வெளியேறிய பிறகு, 'ஆபரேஷன் அலைஸ் வெல்கம்' (Operation Allies Welcome) திட்டத்தின் கீழ் ரஹ்மனுல்லா லக்வாள் அமெரிக்காவில் குடியேறினார்.

 

இந்த சம்பவத்திற்கு பிறகு, மூன்றாம் உலக நாடுகள்" என்று குறிப்பிடப்படும் ஆப்கானிஸ்தான், ஹைட்டி, ஈரான், மியான்மர், வெனிசுலா, ஏமன், சோமாலியா, சூடான் லிபியாவிலிருந்து அமெரிக்காவில் குடியேறுபவர்களுக்கு நிரந்திரத் தடை விதித்து அதிபர் டிரம்ப் உத்தரவிட்டுள்ளார். அமெரிக்காவுக்கு அச்சுறுத்தலாக உள்ளவர்கள் கட்டாயமாக நாடு கடத்தப்படுவார்கள் எனவும் டிரம்ப் தனது Truth social வலைதளத்தில் பதிவிட்டுள்ளார்.

 

இதனால், ஆபரேஷன் அலைஸ் வெல்கம்' (Operation Allies Welcome) திட்டத்தின் கீழ் அமெரிக்காவில் குடியேறிய 82 ஆயிரம் ஆப்கானியர்களுக்கு சிக்கல் எழுந்துள்ளது. இது மட்டுமல்லாமல், "கவனத்திற்குரிய நாடுகள்" என்று பட்டியலிடப்பட்ட 19 நாடுகளில் இருந்து வரும் அனைத்து கிரீன் கார்டு விண்ணப்பங்களையும் முழுமையாக மறுபரிசீலனை செய்யவும் டிரம்ப் உத்தரவிட்டுள்ளார்.

 

மேலும், அமெரிக்க குடியுரிமை பெறாதவர்களுக்கு வழங்கப்படும் அனைத்து மத்திய அரசின் நன்மைகள் மற்றும் மானியங்கள் நிறுத்தப்படும் என்றும் ட்ரம்ப் அறிவித்துள்ளார். ட்ரம்ப் நிர்வாகம் ஏற்கனவே 2026 ஆம் ஆண்டுக்கான அகதிகள் எண்ணிக்கையை 7,500 ஆகக் குறைத்துள்ளது.. முன்னாள் அதிபர் ஜோ பைடன் நிர்வாகத்தின் கீழ் அனுமதிக்கப்பட்ட சுமார் 2 லட்சம் அகதிகள் குறித்து மறுபரிசீலனை செய்யவும் உத்தரவிடப்பட்டுள்ளது.