உலகளவில் X, Spotify, Uber உள்ளிட்ட டஜன் கணக்கான தளங்கள் பாதிப்பு!

உலகின் மிகப்பெரிய இணையச் சேவை வழங்குநர்களில் ஒன்றான கிளவுட்ஃப்ளேர் (Cloudflare) நிறுவனத்தில் ஏற்பட்ட மிகப்பெரிய தொழில்நுட்பக் கோளாறு காரணமாக, உலகம் முழுவதும் டஜன் கணக்கான இணையதளங்கள் முடங்கி, பெரும் குழப்பத்தை ஏற்படுத்தியது.

 

இன்று (நவம்பர் 18, செவ்வாய்க்கிழமை) காலை 11 மணியளவில் கிளவுட்ஃப்ளேர் நிறுவனம் செயலிழந்ததைத் தொடர்ந்து, இந்த பாதிப்பு ஏற்பட்டது.

 

டவுன்டிடெக்டர் (DownDetector) இணையதளத்தில் 10,000-க்கும் மேற்பட்டோர் கிளவுட்ஃப்ளேர் தொடர்பான சிக்கல்களைப் புகாரளித்துள்ளனர். எனினும், உலகின் சுமார் ஐந்தில் ஒரு பங்கு இணையதளங்கள் (20%) கிளவுட்ஃப்ளேர் சேவையைப் பயன்படுத்துவதால், உண்மையான பாதிப்பு மிக அதிகமாக இருக்கும் எனக் கூறப்படுகிறது.

 

முடங்கிய முக்கியத் தளங்கள்:

 

சமூக வலைதளங்கள்: X (முன்னர் Twitter), Grindr

ஓடிடி / இசை: Spotify

சேவைகள்: Uber, Zoom, ChatGPT

விளையாட்டு: League of Legends

பிற நிறுவனங்கள்: Ikea, Vinted, Dayforce, OpenAI மற்றும் Amazon Web Spaces சேவைகளைப் பயன்படுத்தும் தளங்கள்.

ஸ்காட்டிஷ் நாடாளுமன்ற இணையதளம் கூடப் பாதிக்கப்பட்டது.

இந்தக் கோளாறு கிளவுட்ஃப்ளேரின் உலகளாவிய நெட்வொர்க் (Cloudflare Global Network) மையத்தில் இருந்து உருவானதாகத் தெரிகிறது. இது ஒரு “உள் சேவைச் சிதைவு” (internal service degradation) காரணமாக ஏற்பட்டிருக்கலாம் என்றும், இது சில சேவைகளைத் தற்காலிகமாகப் பாதிக்கக்கூடும் என்றும் கிளவுட்ஃப்ளேர் நிறுவனம் தெரிவித்துள்ளது.

 

கிளவுட்ஃப்ளேர் 120-க்கும் மேற்பட்ட நாடுகளில் 330-க்கும் அதிகமான இடங்களில் சர்வர்களை இயக்குகிறது. இது இணையதளங்களின் பாதுகாப்பு, வேகம் மற்றும் ட்ராஃபிக் கையாளுதல் போன்ற சேவைகளை வழங்குவதால், இது செயலிழக்கும்போது அதைச் சார்ந்துள்ள அனைத்துத் தளங்களும் செயல்பட முடியாமல் போயின.

 

புகார்கள் குவிந்ததைத் தொடர்ந்து, பாதிக்கப்பட்டச் சேவைகளை முழுமையாக மீட்டெடுக்கத் தீவிரமாகப் பணியாற்றி வருவதாகக் கிளவுட்ஃப்ளேர் நிறுவனம் அறிவித்துள்ளது.

 

“கிளவுட்ஃப்ளேர் இந்தச் சிக்கலை அறிந்திருக்கிறது, இது பல வாடிக்கையாளர்களைப் பாதிக்க வாய்ப்புள்ளது. கூடுதல் தகவல்கள் கிடைக்கும்போது மேலும் விவரங்கள் வழங்கப்படும்” என்று நிறுவனம் தனது அறிக்கையில் தெரிவித்துள்ளது.

 

சான்டியாகோ (Santiago) தரவு மையத்தில் இன்று செவ்வாய்க்கிழமை பராமரிப்புப் பணிகளை நிறுவனம் திட்டமிட்டிருந்தது குறிப்பிடத்தக்கது.

 

பாதிக்கப்பட்ட அனைத்து இணையதளங்கள் மற்றும் செயலிகளை முழுமையாக மீட்டெடுக்கும் பணிகள் தொடர்ந்து நடைபெற்று வருகின்றன