நிலவுக்கு அனுப்பப்பட்ட ஆர்பிட்டர் நல்ல முறையில் இயங்கி வருவதாகவும் அடுத்த ஏழரை ஆண்டுகளுக்கு அதன் பணியை சிறப்பாக செய்யும் என்றும் இஸ்ரோ சதீஷ் தவான் விண்வெளி ஆராய்ச்சி மைய துணை இயக்குனர் ஆர்.வெங்கட்ராமன் கூறினார்.
திருவண்ணாமலை அருணை பொறியியல் கல்லூரி வளாகத்தில் உலக விண்வெளி வார விழா 2 நாள் கண்காட்சி புதன்கிழமை தொடங்கியது. இதில் மாவட்ட ஆட்சியர் கந்தசாமி, சதீஷ் தவான் விண்வெளி ஆராய்ச்சி மைய துணை இயக்குனர் ஆர்.வெங்கட்ராமன் உள்ளிட்ட பலர் கலந்துகொண்டனர்.
கண்காட்சியில் ஸ்ரீஹரிகோட்டா இஸ்ரோ மையத்திலிருந்து கொண்டுவரப்பட்ட ராக்கெட் மற்றும் செயற்கைகோள் மாதிரிகள், விண்வெளி ஆராய்ச்சி மற்றும் இஸ்ரோவின் சாதனைகள் அடங்கிய படங்களும் வைக்கப்பட்டிருந்தன. இதனை மாணவர்கள் ஆர்வத்துடன் கண்டுரசித்தனர்.
கண்காட்சியை பார்வையிட்டபின் பேசிய வெங்கட்ராமன், நிலவுக்கு மனிதனை அனுப்புவதற்கு முன் பூமியைச் சுற்றிவர அனுப்பும் திட்டம் விரைவில் செயல்படுத்தப்படும் என தெரிவித்தார்.