பயங்கரவாத தடைச்சட்டத்தின் கீழ் எம்.கே.சிவாஜிலிங்கம் மீது தொடரப்பட்ட வழக்கில் இன்று 10 இலட்சம் ரூபா பெறுமதியான இரண்டு சரீரப் பிணைகளில்  செல்ல  கொழும்பு மேல் நீதிமன்றம் உத்தரவிட்டுள்ளது.

 

அத்துடன் இவ்வழக்கு விசாரணையும் எதிர்வரும் ஒக்டோபர் 20ஆம் திகதிக்கு ஒத்திவைக்கப்பட்டுள்ளது.

 

கடந்த 2020ஆம் ஆண்டு யாழ்ப்பாணத்தில் தியாக தீபம் திலீபன் நினைவேந்தல் நிகழ்வை ஏற்பாடு செய்தமை தொடர்பில் முன்னாள் நாடாளுமன்ற உறுப்பினர் எம்.கே.சிவாஜிலிங்கத்தின் மீது வழக்குத் தொடரப்பட்டிருந்தமை குறிப்பிடத்தக்கது.

 

முன்னாள் நாடாளுமன்ற உறுப்பினர் எம்.கே.சிவாஜிலிங்கத்திற்கு எதிராக கொழும்பு மேல் நீதிமன்றத்தில் இன்று குற்றப்பத்திரிக்கை தாக்கல் செய்யப்பட்டது.

 

1987ஆம் ஆண்டு 5 அம்ச கோரிக்கையை முன்வைத்து உண்ணாவிரதப் போராட்டத்தின் போது உயிரிழந்த முன்னாள் தமிழீழ விடுதலைப் புலி உறுப்பினர் திலீபனின் 33ஆவது நினைவு தினம் 2020 ல் நடைபெற்றது.

 

நீதிமன்ற தடையை மீறி அன்றைய தினம் திலீபனின் நினைவு தினத்தை அனுஸ்டித்த குற்றச்சாட்டில் சிவாஜிலிங்கம் உரும்பிராய் பகுதியில் வைத்து கைதுசெய்யப்பட்டார்.

 

2020 செப்டம்பர் 15 ம் திகதி கைது செய்யப்பட்ட சிவாஜிலிங்கத்தை யாழ்ப்பாணம் நீதிமன்றம் எச்சரித்து பிணையில் விடுதலை செய்திருந்தது.

 

இந்நிலையில் அவருக்கு எதிராக கொழும்பு மேல் நீதிமன்றத்தில் இன்று வெள்ளிக்கிழமை குற்றப்பத்திரிகை தாக்கல் செய்யப்பட்டுள்ளது.