இலங்கைப் பொருளாதார நெருக்கடி என்பது 2019 இல் தொடங்கிய இலங்கை நாட்டில் நடந்து வரும் நெருக்கடியாகும். 1948 இல் விடுதலை பெற்ற பின்னர் நாட்டில் ஏற்பட மிக மோசமான பொருளாதாரநெருக்கடி இதுவாகும். 2010 ஆம் ஆண்டிலிருந்து, இலங்கையின் வெளிநாட்டுக் கடன் கடுமையாக உயர்ந்தது.

 

இலங்கையில் கடன் தற்போது 51 பில்லியன் டாலராக உள்ளது. கடனுக்கான வட்டியை கூட கட்ட முடியாத நிலையில் இலங்கை உள்ளது. இலங்கையின் பொருளாதாரத்தை வலிமையாக வைத்திருக்க உதவும் முக்கிய துறையான சுற்றுலா துறை 2019ம் ஆண்டு கொரோனா பரவலுக்கு பின்னர் சிதறிப்போனது. இலங்கை பணத்தின் மதிப்பு 80 சதவீதம் வீழ்ச்சி அடைந்துள்ளது. இதனால் இறக்குமதி செலவு மிகுந்ததாக மாறியது. இதேபோல், ஏற்கனவே வீழ்ச்சியில் இருந்த பண வீக்கம் மேலும் கடுமையான வீழ்ச்சியை சந்தித்தது.

 

 

 

இந்த நிலையில் பொருளாதார நெருக்கடியில் சிக்கியுள்ள இலங்கைக்கு இந்தியா, சீனா, ஜப்பான் என பல்வேறு நாடுகள் கடனுதவி வழங்கி வருகின்றன. அத்துடன் ஆசிய வளர்ச்சி வங்கி, சர்வதேச நிதியம் உள்ளிட்ட அமைப்புகளும் உதவிக்கரம் நீட்டி வருகின்றன. இந்த கடன்கள் தொடர்பாக கொழும்பு நகரை மையமாக கொண்டு இயங்கி வரும் 'வெரிட் ரிசர்ச்' என்ற ஆய்வு அமைப்பு ஆய்வு செய்து உள்ளது. இதில் இந்த ஆண்டில் இலங்கைக்கு அதிக கடன் வழங்கிய நாடாக இந்தியா உள்ளதாக அந்த அமைப்பு கூறியுள்ளது.

 

இந்த ஆண்டின் முதல் 4 மாதங்களில் மட்டும் இலங்கை பெற்ற 968 மில்லியன் டாலர் வெளிநாட்டு கடனில், இந்தியா 377 மில்லியன் டாலர் (இந்திய மதிப்பில் சுமார் ரூ.2,800 கோடி) வழங்கி இருப்பது கண்டறியப்பட்டு உள்ளது. இந்தியாவுக்கு அடுத்ததாக ஆசிய வளர்ச்சி வங்கி 360 மில்லியன் டாலர் கடன் வழங்கி இருப்பதாக அந்த அமைப்பு கூறியுள்ளது. கடந்த 2017 முதல் 2021-ம் ஆண்டுகளுக்கு இடையேயான காலகட்டத்தில் இலங்கைக்கு அதிக கடன் வழங்கிய நாடாக சீனா இருந்துள்ளது. ஆனால் இலங்கையின் பொருளாதார நெருக்கடி உச்சக்கட்டத்தில் இருக்கும் இந்த ஆண்டில் கடன் வழங்கிய நாடுகளில் இந்தியா முதலிடத்தில் இருக்கிறது . இலங்கைக்கு அதிகம் கடன் உதவி செய்த நாடுகளில் இந்தியா இருப்பது உலக நாடுகளின் கவனத்தை ஈர்த்துள்ளது.