ஈழத்தின் பாடல் பெற்ற திருத்தலங்களில் ஒன்றான திருகோணமலை திருக்கோணேச்சரர் ஆலயத்தில் சிவலிங்கம் ஒன்று இனந்தெரியாத நபர்களினால் உடைக்கப்பட்டுள்ளது. நேற்று இரவு இந்த சம்பவம் இடம்பெற்றுள்ளது.

ஆலயத்தின் அன்னதானமடத்திற்கு அருகிலுள்ள சிவலிங்கமே இவ்வாறு உடைக்கப்பட்டுள்ளது. எதிர்வரும் திங்கட் கிழமை சிவராத்திரி விரதம் அனுஷ்டிப்பதற்கு ஏதுவாக குறித்த இடத்தில் ஏற்பாடுகள் மேற்கொள்ளப்பட்டிருந்தன.
இந்த நிலையில் நேற்றைய தினம் இரவு, ஆலயத்திற்கு வருகை தந்த இனந்தெரியாத விசமிகள் குறித்த சிவலிங்கத்தை உடைத்துள்ளனர். குறித்த செயற்பாடு திருகோணமலை வைச மக்கள் மத்தியில் பெரும் கவலையை ஏற்படுத்தியுள்ளது.
இச் சம்பவம் இடம்பெற்ற திருகோணமலை ஆலய சூழல் இராணுவம் மற்றும் காவல்துறையின் கடுமையான பாதுகாப்புக்கு கீழ் வைக்கப்பட்டிருக்கும் பகுதி என்பதும் குறிப்பிடத்தக்கது. அத்துடன் இந்த விடயம் தொடர்பில் காவல்துறையில் முறைப்பாடு பதிவு செய்யப்பட்டுள்ளது