அரச பயங்கரவாதம் தற்போது நாட்டில் தலையெடுத்துள்ளமையால் தமிழ் மக்கள் ஆயுதப் போராட்டத்திற்கு தள்ளப்படும் வாய்ப்பு ஏற்படலாமென நாடாளுமன்ற உறுப்பினர் மனோ கணேசன் எச்சரிக்கை விடுத்துள்ளார்.
இலங்கை அரசியலில் ஏற்பட்டுள்ள குழப்பநிலை தொடர்பில் நேற்று (வெள்ளிக்கிழமை) கருத்து தெரிவிக்கும்போதே, மனோ கணேசன் இதனை கூறியுள்ளார். மேலும் குறிப்பிட்டுள்ளதாவது,
“நாட்டின் நல்லிணக்கத்தையும் ஜனநாயகத்தையும் பாதிக்கும் வகையிலேயே நாடாளுமன்ற நகர்வுகள் காணப்படுகின்றது.
இவ்வாறு தொடர்ச்சியாக ஜனநாயகத்துக்கு முரணான செயற்பாடுகள் இடம்பெறுமானால், உள்நாட்டிலும் வெளிநாட்டிலும் இருக்கின்ற தமிழ் மக்கள் ஆயுத போராட்டத்தை மேற்கொள்வதற்கு தள்ளப்படுவார்கள்.
இவ்வாறு நாட்டின் அபகீர்த்தியை ஏற்படுத்திய ஜனாதிபதி மைத்திரிபால சிறிசேன மற்றும் பிரதமர் மஹிந்த ராஜபக்ஷ ஆகியோர் இதற்கான முழுப்பொறுப்பையும் ஏற்றுக்கொள்ள வேண்டும்.
இதேவேளை ஜனாதிபதி மைத்திரி, நாட்டு மக்களிடத்தில் நல்லிணக்கத்தை ஏற்படுத்தி நாட்டை சிறந்த அபிவிருத்தியை நோக்கி இட்டுச் செல்வாரென எண்ணிய அனைத்தும் தலைகீழாக தற்போது காணப்படுகின்றது” என மனோ கணேசன் கவலை வெளியிட்டுள்ளார்.