தமிழ் மக்களின் பிரதிநிதிகளாகக் கருதப்படும் தமிழ் தேசிய கூட்டமைப்பு பல தடவைகள் தமிழ் மக்களின் குரலாக செயற்பட தவறியுள்ளதாக, அருட்தந்தை இ.செபமாலை அடிகளார் தெரிவித்துள்ளார்.
மன்னாரில் இன்று (புதன்கிழமை) நடைபெற்ற நிகழ்வொன்றில் ஊடகவியலாளர்களுக்கு கருத்து தெரிவிக்கையிலேயே இவ்வாறு குறிப்பிட்டார்.
அங்கு தொடர்ந்து தெரிவித்த அவர், ”கடந்த சில நாட்களாக இலங்கை முழுவதும் ஏற்பட்டுள்ள அரசியல் குழப்ப நிலை காரணமாக எந்த கட்சி யாருக்கு ஆதரவளிப்பது என்ற குழப்பநிலையில் உள்ளது. இந்நிலையில் தமிழ் தேசிய கூட்டமைப்பானது தீர்மானிக்கும் சக்தியாக காணப்படுகின்றது.
தமிழ் தேசிய கூட்டமைப்பு என்பது தமிழ் மக்களால் தெரிவு செய்யப்பட்டது. தமிழ் மக்களின் பிரதிநிதிகள் என ஏற்றுக்கொள்ளப்படுகின்றனர்.
ஆனால், அண்மை காலமாக பல சந்தர்ப்பங்களில் கூட்டமைப்பு தமிழ் மக்களின் குரலாக ஒழிக்காத சந்தர்ப்பங்களும் அமைந்திருக்கின்றன. ஆனாலும் இச்சந்தர்ப்பத்தில் அவர்கள் இதனை சரியாக பயன்படுத்த வேண்டும்.
தமிழ் மக்களுக்கு அரசியல் தீர்வு, தமிழ் மக்களுடைய உரிமை பிரச்சினை, தமிழ் மக்களுடைய பிரச்சினை தொடர்பாக எந்த அரசாங்கம் தாங்கள் செய்வோம் என்று சொல்கின்றதே அதற்கு கூட்டமைப்பு ஒத்துழைப்பு வழங்க வேண்டும்.
மேலும், ஐ.நா.வில் கொடுக்கப்பட்ட வாக்குறுதிகளை எந்த அரசாங்கம் நிறைவேற்றுவதாக வாக்குறுதி கொடுக்கின்றதோ அந்த அரசாங்கத்துக்கே ஒத்துழைப்பு வழங்கவேண்டும்.
போரக்குற்றம், இனப்படுகொலை, காணமல் ஆக்கப்பட்டோருடைய பிரச்சினை, அரசியல் கைதிகளுடைய விடுதலை, அரசியல் சீர்திருத்தம், தமிழ் மக்களின் சுய நிர்ணய உரிமை தொடர்பாக எந்த அரசாங்கம் தாங்கள் செய்வோம் என்று வாக்குறுதி கொடுக்கின்றார்களோ அவர்களுக்கு ஒத்துழைப்பையும் ஆதரவையும் வழங்கவேண்டும்” எனத் தெரிவித்தார்.