அரச தலைவர் கோட்டாபய ராஜபக்ச ஒரே இரவில் எடுத்த முடிவால் முழு நாடுமே சீரழிந்துள்ளதாகவும், அவரது உரத்தடை உத்தரவால் இன்று இலங்கை உணவு நெருக்கடியை எதிர்நோக்கியுள்ளதாகவும் எதிர்க்கட்சித் தலைவர் சஜித் பிரேமதாஸ தெரிவித்துள்ளார்.

 

எதிர்காலத்தில் இலங்கை மக்கள் தொகையில் மூன்றில் ஒரு பகுதியினர் ஊட்டச் சத்து குறைபாட்டால் பாதிக்கப்படும் அபாயம் ஏற்பட்டுள்ளதாக நேற்றைய நாடாளுமன்ற அமர்வில் உரைற்றும்போது சஜித் பிரேமதாஸ தெரிவித்தார்.

 

இதன்போது மேலும் கருத்து தெரிவித்த அவர்,

 

“இதுவரை அரிசியில் தன்னிறைவு பெற்ற நம் நாடு, அரச தலைவர் தலைமையிலான அரசாங்கம் இரசாயன உரங்களை ஒரே இரவில் தடை செய்ய மேற்கொள்ளப்பட்ட முட்டாள் தனமான ஒரு முடிவினால் முற்றாக சரிந்தது.

 

 

 

ஊட்டச் சத்து குறைபாட்டால் பாதிக்கப்படும் அபாயம்

இந்த முடிவானது இன்று அரிசி விலை கடுமையாக உயர்வதற்கு வழிவகுத்தது மட்டுமல்லாமல், உணவு நெருக்கடிக்கும் வழி வகுத்துள்ளது.

 

இது மாத்திரமன்றி எதிர்காலத்தில் மக்கள் தொகையில் சுமார் 1/3 பகுதியினர் ஊட்டச் சத்து குறைபாட்டால் பாதிக்கப்படலாம்.

 

 

 

ஒவ்வொருவரும் இரண்டு வேளை உணவுக்கு மாத்திரம் மட்டுப்படுத்த வேண்டியிருக்கும் என தற்போதைய பிரதமரும் கூட கூறுகிறார்.

 

மனித நுகர்வுணவு

வேகமாக உயர்ந்து வரும் பொருட்களின் விலைகள் காரணமாக மனித நுகர்வுணவு வேளையில் புரதத்தின் அளவு படிப்படியாக குறைந்து வருகின்றன.

 

 

 

இதற்குப் பொறுப்பானவர்களும், பொறுப்புக்கூற வேண்டியவர்களும் தங்களின் தவறுக்காக மக்களிடம் மன்னிப்புக் கேட்டாலும் கூட தவறைத் திருத்துவதற்கு இது மாத்திரம் பரிகாரமாக அமையாது.

 

தமது வாழ்வாதாரமாக விவசாயம் மேற்கொண்டு வந்த மக்களுக்கு விவசாயம் செய்ய முடியாத நிலையை ஏற்ப்படுத்தி, பிற தொழிலில் ஈடுபட்டுள்ள மக்களை தங்களின் தேவைக்காக விவசாயம் செய்யச் சொல்லிக் கோருவது தான் இப்போது அரசாங்கத்தின் ஒரே தீர்வாகத் தெரிகிறது.

 

 

 

எவ்வாறாயினும்,எதிர்வரும் காலங்களில் மக்களின் பட்டினியைப் போக்க உணவு விநியோக வலயமைப்பை வலுப்படுத்த துரித நடவடிக்கை எடுக்கப்பட வேண்டியது அவசியமாகும்” என்றார்.