யுத்தத்தினால் பாதிக்கப்பட்டுள்ள வடக்கு, கிழக்கு மக்களின் வாழ்வாதாரத்தை மேம்படுத்தும் பொருட்டு அப்பகுதிகளில் அபிவிருத்தி செயற்பாடுகளை மேற்கொள்வதற்கு சீனா முன்வந்துள்ளதாக  தெரிவிக்கப்படுகின்றது.
இலங்கையில் பல்வேறு அபிவிருத்தி செயற்பாட்டு திட்டங்கள் சீனாவினால் மேற்கொள்ளப்பட்டு வருகின்றது. இந்நிலையில்  வடக்கு, கிழக்கு மக்களும் அதன் பயன்களை பெறவேண்டுமென்ற நோக்கத்தில் இச்செயற்பாட்டினை சீனா மேற்கொள்ள முன்வந்துள்ளதாக கூறப்படுகின்றது.
இதேவேளை வடக்கு, கிழக்கு  பகுதிகளில் அபிவிருத்தி செய்ய வேண்டியதன் அவசியம் தொடர்பாக கொழும்பிலுள்ள சீன தூதுவராலயத்தின் அரசியல் பிரிவின் தலைவர் லுவா சொங் குறிப்பிட்டுள்ளதாவது,
“தென் பகுதிகளுக்கு மாத்திரமின்றி வடக்கு கிழக்கு பகுதிகளிலும் வீடுகள் மற்றும் வீதி நிர்மாண பணிகளை முன்னெடுக்க வேண்டும்.
அப்போதுதான் யுத்தத்தினால் பாதிக்கப்பட்டுள்ள வடக்கு மக்களுக்கு அதன் பயன்களை பெற்று தங்களது வாழ்வாதாரத்தை முன்னேற்றிக்கொள்ள ஒரு வாய்ப்பாக அமையும்.
மேலும் இலங்கையில் இடம்பெற்ற உள்நாட்டு யுத்தம் நிறைவுக்கு வந்ததன் பின்னர் பாரிய மாற்றத்தினை தற்போது காணக்கூடியதாக உள்ளது.
இதனால் வடக்கு, கிழக்கு மக்களும் நாட்டில் இடம்பெறுகின்ற அபிவிருத்தி செயற்பாடுகளை அனுபவிக்க வேண்டியது அவசியம்” என லுவா சொங் சுட்டிக்காட்டியுள்ளார்.

வடபகுதியில் வீடமைப்பு திட்டங்களை முன்னெடுக்க சீனாவும் விரும்புகிறதுஸ.

இலங்கையின் யுத்தத்தினால் பாதிக்கப்பட்ட வடபகுதியில் வீடமைப்பு திட்டங்களை முன்னெடுக்க விரும்புவதாக சீனா தெரிவித்துள்ளதாக ரொய்ட்டர் செய்திச்சேவை தெரிவித்துள்ளது.
 
கொழும்பிற்கான சீனா தூதரகத்தின் அரசியல் பிரிவின் தலைமை அதிகாரி லுவோ சொங் இதனை தெரிவித்துள்ளார் எனவும் உள்நாட்டு யுத்தத்தினால் மிகவும் பாதிக்கப்பட்ட வடக்கு கிழக்கில் வீடுகளையும் வீதிகளையும் அமைத்துக்கொடுப்பதற்கு சீனா விரும்புகின்றது என அவர் தெரிவித்துள்ளதாகவும் தெரிவித்துள்ளது.
தற்போது நிலைமை வேறுமாதிரியானதாக உள்ளதால் அதிகளவு திட்டங்களை இலங்கை அரசாங்கம் மற்றும் தமிழ் சமூகத்தின் ஆதரவுடன் முன்னெடுக்க தயாராகவுள்ளோம் எனவும் அவர் தெரிவித்துள்ளார் எனவும் தெரிவிக்கப்பட்டுள்ளது.
இதேவேளை சீனா வடக்கில் வீடுகளை கட்டி வழங்குவதற்கு விருப்பம் தெரிவித்துள்ளமையை இரு அமைச்சர்கள் உறுதி செய்துள்ளனர் எனவும் ஏனைய போட்டியாளர்களை விட குறைந்த செலவில் சீனா கட்டித்தர முன்வந்துள்ளதாக அந்த அமைச்சர்கள் தெரிவித்துள்ளனர் எனவும் ரொய்ட்டர் செய்திச்சேவை தெரிவித்துள்ளது.
கிராமிய அபிவிருத்தி தி;ட்டங்களான வீடுகளை அமைத்தல் நீர்சேகரிப்பு வசதிகளை அமைத்தல் போன்றவற்றில் ஈடுபடுவதற்கு கூட சீனா தயாராகவுள்ளதாக பெயர் குறிப்பிட விரும்பாத அமைச்சர் ஒருவர் தெரிவித்துள்ளார் எனவும் தெரிவித்துள்ள ரொய்ட்டர் கடந்த ஏப்ரல் மாதம் சீனாவின் நிறுவனமொன்று வடக்கில் 40,000 வீடுகளை கட்டுவதற்கான 300 மில்லியன் டொலர் திட்டத்தை பெற்றது எனவும் சீனாவின் எக்சிம் வங்கி இதற்கு நிதி உதவ வழங்க முன்வந்தது எனவும் தெரிவித்துள்ளது.
எனினும் பொதுமக்கள் செங்கல் வீடுகளை கோரியதை தொடர்ந்து இந்த திட்டம்; இடைநிறுத்தப்பட்டதாகவும் இது இந்தியா இந்த விடயத்தில் பங்களிப்பு செய்வதற்கான வாய்ப்பை உருவாக்கியுள்ளது என தமிழ் தேசிய கூட்டமைப்பின் நாடாளுமன்ற உறுப்பினர் எம் ஏ சுமந்திரன் தெரிவித்துள்ளார் எனவும் தெரிவித்துள்ள ரொய்ட்டர் செய்தி சேவை இந்திய உதவியுடன் வீடமைப்பு திட்டத்தை முன்னெடுப்பது தொடர்பில் அதிகாரிகள் இந்தியாவுடன் பேச்சுவார்த்தைகளை ஆரம்பித்துள்ளனர் எனவும் தெரிவித்துள்ளது.