மைத்திரிபால சிறிசேனவின் வெற்றிக்கு ஜனாதிபதி மஹிந்த ராஜபக்ஷ தனது வாழ்த்துக்களை தெரிவித்துள்ளார்.

ஜனாதிபதி மஹிந்த ராஜபக்ஷ, புதிய ஜனநாய முன்னணியின் ஜனாதிபதி வேட்பாளர் மைத்திரிபால சிறிசேனவுடன் சற்றுமுன்னர் தொலைபேசியில் உரையாடியே தனது வாழ்த்துக்களைத் தெரிவித்துக் கொண்டுள்ளார்.

மைத்திரி இன்று ஜனாதிபதியாக பதவியேற்பார்

பொது வேட்பாளராக போட்டியிட்ட முன்னாள் சுகாதார அமைச்சர் மைத்திரிபால சிறிசேன இன்று இலங்கையின் புதிய ஜனாதிபதியாக பதவியேற்க உள்ளதாக அரசியல் வட்டார தகவல்கள் தெரிவிக்கின்றன.

நடந்து முடிந்த ஜனாதிபதித் தேர்தலில் மகிந்த ராஜபக்ஷவை எதிர்த்து பொது எதிரணியில் போட்டியிட்ட மைத்திரிபால சிறிசேன வாக்குகள் எண்ணப்பட்டு முடிவுகள் அறிவிக்கப்பட்டு வரும் நிலையில், மகிந்தவை விட முன்னிலையில் இருந்து வருகிறார்.

அநேகமாக வாக்கு எண்ணும் நிலையங்களில் வாக்குகள் எண்ணப்பட்டு விட்டதாகவும் உத்தியோகபூர்வ முடிவுகள் இன்னமும் முழுமையாக வெளியாகவில்லை எனவும் தெரிவிக்கப்படுகிறது.

எனினும், பொது வேட்பாளர் மைத்திரிபால சிறிசேன வாக்கெடுப்பில் முன்னணி வகிக்கின்றார்.

இதன் அடிப்படையில் மைத்திரிபால சிறிசேன இன்று மாலை பெரும்பாலும் பதவிப் பிரமாணம் செய்து கொள்ளக் கூடிய சாத்தியங்கள் காணப்படுகின்றன.

தோல்வியை ஒப்புக் கொள்கின்றோம்: பசில் ராஜபக்ச

தோல்வியை ஒப்புக்கொள்வதாக பொருளாதார அபிவிருத்தி அமைச்சர் பசில் ராஜபக்ச தெரிவித்துள்ளார்.

தேர்தல் முடிவுகள் தொடர்பில் கருத்து வெளியிட்ட போது அவர் இதனைக் குறிப்பிட்டுள்ளார்.

2015ம் ஆண்டு ஜனாதிபதி தேர்தல் தொடர்பான மக்களின் தீர்ப்பை ஏற்றுக் கொள்கின்றோம்.

ஐக்கிய மக்கள் சுதந்திரக் கூட்டமைப்பின் வேட்பாளர் மஹிந்த ராஜபக்சவிற்காக வாக்களித்த அனைத்து வாக்காளர்களுக்கும் நன்றி.

13 மாவட்டங்களில் எமது கட்சிக்கு வெற்றி கிட்டியுள்ளது.

2010ம் ஆண்டு ஜனாதிபதி தேர்தலுடன் ஒப்பீடு செய்யும் போது கொழும்பு, கண்டி மற்றும் பொலனறுவை மாவட்டங்களில் தோல்வியைத் தழுவியுள்ளோம்.

2005ம் ஆண்டு 2010ம் ஆண்டு ஜனாதிபதி தேர்தலைப் போன்றே இம்முறை தேர்தலிலும் ஆறு மாவட்டங்களில் எதிர்க்கட்சியினர் வெற்றிகளை பதிவு செய்துள்ளனர்.

அதிக மக்கள் செறிவாக வாழும் மாவட்டங்கள் மாகாணங்களில் மஹிந்த ராஜபக்சவிற்கு வெற்றி கிட்டியுள்ளது. இது ஓர் வகையிலான வெற்றியேயாகும்.

வெற்றியின் பின்னர் நாட்டின் ஐக்கியம் மற்றும் பௌதீக ஒருமைப்பாட்டைக் கருத்திற் கொண்டு செயற்படுவார்கள் என கருதுகின்றோம்.

தேர்தலில் ஏற்பட்ட பின்னடைவை ஒப்புக் கொள்கின்றோம். நாட்டை விட்டு வெளியேறப் போவதாக வெளியாகும் தகவல்களில் உண்மையில்லை.

நாம் நாட்டிலேயே தங்கியிருப்போம் என பசில் ராஜபக்ஸ தெரிவித்துள்ளார்.