அமெரிக்காவின் டெக்சாஸ் மாகாணத்தில் சிறிய ரக விமானம் ஒன்று சூப்பர் மார்க்கெட்டின் பார்க்கிங் தளத்தில் விழுந்து நொறுங்கிய விபத்து தொடர்பாக போலீஸார் தீவிர விசாரணை மேற்கொண்டு வருகின்றனர்.

 

டெக்சாஸ் மாகாணத்தில் போல்வார்டு பகுதியில் உள்ள பிளானோ நகரில் செவ்வாய்க்கிழமை மாலை ஆறு மணி அளவில் சிறிய ரக விமானம் ஒன்று திடீரென விழுந்து நொறுங்கி விபத்திற்கு உள்ளானது. அங்கிருந்த சூப்பர் மார்க்கெட் ஒன்றின் பார்க்கிங் தளத்தில் விமானம் விழுந்த போது, அங்கு யாரும் இல்லாததால் பெரும் உயிர்ச்சேதம் தவிர்க்கப்பட்டது.

 

விமானம் விழுந்த இடத்தின் அருகே நிறுத்தப்பட்டு இருந்த இரண்டு கார்கள் தீப்பிடித்து எரிந்தன. மேலும் விமானத்தை ஓட்டி வந்த விமானியும் உயிரிழந்தார்.

 

விமானம் விழுந்த இடத்தில் ஆளுயரத்திற்கு தீப்பற்றி எரிவதாக தகவல் அறிந்தவுடன் சம்பவ இடத்திற்கு விரைந்து வந்த தீயணைப்பு துறையினர் தீயை நீண்ட நேரம் போராடி கட்டுக்குள் கொண்டு வந்தனர். தொடர்ந்து விமானத்தில் பயணித்த விமானியின் உடலை மீட்டு விசாரணையை துவக்கினர். இந்த சிறிய ரக விமானம் எந்த ஊரில் இருந்து வந்தது, இதை ஓட்டி வந்தவர் யார் என்பது தொடர்பான எந்த தகவல்களும் இதுவரை கிடைக்கப்பெறவில்லை.

 

இதையடுத்து அருகாமையில் உள்ள விமான நிலையங்களில் சிறிய ரக விமானம் ஏதேனும் புறப்பட்டுச் சென்றதா என போலீஸார் தீவிரமாக விசாரணை மேற்கொண்டு வருகின்றனர். இந்த விபத்து தொடர்பாக தேசிய போக்குவரத்து பாதுகாப்பு ஆணையமும் விசாரணை மேற்கொண்டு வருகிறது. இந்த விபத்தில் நல்வாய்ப்பாக தரையில் இருந்த யாருக்கும் உயிரிழப்பு காயமோ ஏற்படவில்லை.