அரசாங்கத்திற்கு எதிராக, சஜித் பிரேமதாச (Sajith Premadasa) தலைமையில் பிரதான எதிர்க்கட்சியான ஐக்கிய மக்கள் சக்தியினால் ஏற்பாடு செய்யப்பட்டுள்ள பாரிய போராட்டம் இன்று பிற்பகல் 2 மணிக்கு கொழும்பில் நடைபெறவுள்ளது.

 

‘நாடு நாசம், மீட்டெடுப்போம்’ - எனும் தொனிப்பொருளின் கீழ் நடைபெறவுள்ள இப்போராட்டத்தில் ஐக்கிய மக்கள் சக்தியில் அங்கம் வகிக்கும் பங்காளிக்கட்சிகள் மற்றும் சிவில் அமைப்புகள் ஆகியவற்றின் பிரதிநிதிகளும், மக்களும் மற்றும்  கட்சி ஆதரவாளர்களும் பங்கேற்கவுள்ளனர்.

 

நாட்டில் பொருட்களின் விலை தொடர்ச்சியாக அதிகரித்துவருவதால் மக்கள் பெரிதும் பாதிக்கப்பட்டுள்ளனர். அத்தியாவசியப் பொருட்களுக்கு ஏற்பட்டுள்ள தட்டுப்பாடும் மக்களுக்கு பெரும் நெருக்கடியாக மாறியுள்ளது.

 

அந்நிய செலாவணி கையிருப்பும் சடுதியாக குறைவடைந்துள்ளது. பொருளாதாரமும் சிதைவடைந்துள்ளது. எனவே, இவற்றை சீர்செய்வதற்கு அரசாங்கத்திற்கு ஒரு மாதம் அவகாசம் வழங்கப்படவுள்ளது.

 

இன்றைய போராட்டத்தில் இது தொடர்பான அறிவிப்பு விடுக்கப்படும். குறித்த காலக்கெடுவுக்குள் தீர்வு இல்லையேல் போராட்டம் தீவிரப்படுத்தப்படும் என ஐக்கிய மக்கள் சக்தி அறிவித்துள்ளது.

 

இதேவேளை எதிர்வரும் காலங்கள் ஐக்கிய தேசிய கட்சி மற்றும் மக்கள் விடுதலை (ஜே.வி.பி) ஆகியனவும் அரசாங்கத்திற்கு எதிராக பொருளாதார நெருக்கடியைக் கண்டித்து போராட்டங்களை முன்னெடுக்கவுள்ளதாக அறிவித்துள்ளன.

 

அமைச்சுப் பதவியை எப்போது விலகுவது தொடர்பில் அமைச்சர் வாசுதேவ நாணயக்கார (Vasudeva Nanayakkara) விளக்கம் அளித்துள்ளார்.

 

அரசாங்கம் சர்வதேச நாணய நிதியத்துடன் உடன்படிக்கை கைச்சாத்திட்டால் அந்த நொடியே தாம் பதவியை துறப்பேன் என அவர் மேலும் தெரிவித்துள்ளார்.

 

தொடர்ந்தும் அவர் கருத்து வெளியிடுகையில், 

 

சர்வதேச நாணய நிதியத்துடன் அரசாங்கம் உடன்படிக்கை கைச்சாத்திடுவதற்கான சாத்தியங்கள் தென்படுகின்றது. அரசாங்கம் சில நிபந்தனைகளை பூர்த்தி செய்யும் முனைப்புக்களில் செயற்பட்டு வருகின்றது.

 

சர்வதேச நாணய நிதியத்துடன் அரசாங்கம் உடன்படிக்கை செய்து கொண்டால், கடுமையான நிபந்தனைகள் விதிக்கப்படக்கூடும். 

 

ரூபாவின் பெறுமதியை மிதக்கச் செய்தல், பொருட்களின் விலையை கட்டுப்படுத்தாமை உள்ளிட்டன சர்வதேச நாணய நிதியத்தின் நிபந்தனைகளாக காணப்படுகின்றன.

 

கடன் பெற்றுக் கொள்ளும் நோக்கில் நிதி அமைச்சர் சர்வதேச நாணய நிதி பிரதிநிதிகளுடன் பேச்சுவார்த்தை நடாத்தியுள்ளதாக தகவல்கள் கிடைக்கப் பெற்றுள்ளன.

 

சர்வதேச நாணய நிதியத்துடன் உடன்படிக்கை கைச்சாத்திட்டால் உடனடியாக தாம் பதவி விலகுவதாக வாசுதேவ நாணயக்கார மேலும் தெரிவித்துள்ளார்.