தூத்துக்குடி: கொடுத்த கடனை திருப்பிக் கேட்டதால் ஆத்திரமடைந்த இளைஞர் ஒருவர் கூலிப்படை உதவியுடன் அந்த நபரை காருடன் எரித்துக் கொன்ற சம்பவம் தூத்துக்குடியில் பரபரப்பை ஏற்படுத்தியுள்ளது.

 

தூத்துக்குடி மாவட்டம் சாயல்குடியைச் சேர்ந்தவர் நாகஜோதி. பெரும் தொழிலதிபரான இவர், அடிக்கடி வெளியூர்களுக்கு சென்று வருவது வழக்கம். அப்படி வெளியூர்கள் செல்லும் போது தனத காருக்கு டிரைவராக மைக்கெல் ராஜ் (33) என்பவரை நாகஜோதி அமர்த்துவது வழக்கம். இதனால் நாகஜோதி மற்றும் அவரது குடும்பத்தினருடன் மைக்கெல் ராஜுக்கு பழக்கம் ஏற்பட்டது.

 

 

 

இந்த சூழலில், கடந்த சில மாதங்களுக்கு முன்பு நாகஜோதியிடம் ரூ.2 லட்சம் கடன் கேட்டுள்ளார் மைக்கெல் ராஜ். அடகு வைத்த தனது தங்க நகைகள் ஏலத்திற்கு வருவதாகவும், அதனை மீட்பதற்காக ரூ.2 லட்சம் தரும்படியும் மைக்கெல் ராஜ் கேட்டுள்ளார். நீண்டநாள் பழக்கம் என்பதால் நாகஜோதியும் அவர் கேட்ட பணத்தை கொடுத்திருக்கிறார். ஆனால் பல மாதங்களாகியும் மைக்கெல் ராஜ் வாங்கிய கடனை திருப்பிக் கொடுக்கவில்லை.

 

 

கறாராக பேசியதால் ஆத்திரம்: இதையடுத்து, சில நாட்களுக்கு முன்பு மைக்கெல் ராஜுக்கு போன் போட்ட நாகஜோதி, கடனை உடனடியாக திருப்பிக் கொடுக்குமாறு கறாராக பேசியுள்ளார். இதனால் ஆத்திரமடைந்த மைக்கெல் ராஜ், நாகஜோதியை தீர்த்துக்கட்ட முடிவு செய்தார். இதையடுத்து, நாகஜோதியை நேற்று முன்தினம் சந்தித்த மைக்கெல் ராஜ், விளாத்திகுளத்தில் தனது நண்பன் ரூ.2 லட்சத்துடன் காத்துக் கொண்டிருப்பதாக கூறியுள்ளார். இப்போது சென்றால் பணத்தை வாங்கிக் கொள்ளலாம் எனக் கூறியுள்ளார்.

 

 

"கடனை திருப்பி கேட்பியா..?" இதனை நம்பிய நாகஜோதி, மைக்கெல் ராஜுடன் காரில் சென்றார், போகும் வழியிலேயே தனது நண்பர்கள் என 3 பேரை வண்டியில் ஏற்றியுள்ளார் நாகஜோதி. அடுத்த சில நிமிடங்களிலேயே காரை நிறுத்திய மைக்கெல் ராஜ், "ஏண்டா கடன் கொடுத்தா திருப்பிக் கேட்டு டார்ச்சர் செய்வியா" எனக் கூறி நாகஜோதியை சரமாரியாக தாக்கியுள்ளார். மேலும், காரில் இருந்த 3 பேரும் நாகஜோதியை தாக்கியுள்ளனர். இதில் நாகஜோதி மூச்சு பேச்சின்றி மூர்ச்சையாகி விழுந்துள்ளார்.

 

 

காருடன் எரித்த கொடுமை: இதனைத் தொடர்ந்து, வைப்பார் - பல்லாக்குளம் பகுதியில் உள்ள காட்டுப்பகுதிக்கு காரில் சென்ற அவர்கள், விறகுக்கட்டைகளை காருக்குள் இருந்த நாகஜோதி மீது போட்டுவிட்டு பெட்ரோல் ஊற்றி தீ வைத்தனர். இதில் காருடன் சேர்ந்து நாகஜோதியும் எரிந்து எலும்புக் கூடு ஆனார். இந்நிலையில், இதுகுறித்து தகவலறிந்த போலீஸார், சம்பவ இடத்திற்கு சென்று விசாரணை நடத்திய போது, காருக்கு சற்று தூரத்தில் மைக்கெல் ராஜின் செல்போன் விழுந்து கிடந்துள்ளது.

 

 

தூக்கிய போலீஸார்: அதை வைத்து துப்பு துலக்கிய போலீஸார் தொழிலதிபர் நாகஜோதியை கொலை செய்தது மைக்கெல் ராஜ் என்பதை கண்டுபிடித்தனர். மேலும், கொலைக்கு உடந்தையாக இருந்த மாரி, கணபதி, குழந்தைக் கனி ஆகிய 3 கூலிப்படையினரையும் போலீஸார் கைது செய்தனர். கொடுத்த கடனை திருப்பிக் கேட்டதால் தொழிலதிபர் கொலை செய்யப்பட்ட சம்பவம் தூத்துக்குடியில் பெரும் சோகத்தையும், அதிர்ச்சியையும் ஏற்படுத்தியுள்ளது.