வட இந்திய தொழிலாளர்கள் எண்ணிக்கை அதிகரித்து வருவதால் தமிழகத்திற்கு பெரிய பாதிப்புகள் ஏற்பட உள்ளதாக எச்சரிக்கைகள் வந்த வண்ணம் உள்ளன.

 

 

 

அரசு என்ன நடவடிக்கைகள் எடுக்க வேண்டும்?

சென்னை சென்ட்ரல் ரயில் நிலையத்தில் ஆயிரக்கணக்கான வட இந்திய தொழிலாளர்கள் வந்திறங்கும் வீடியோ ஒன்று சமூக வலைதளங்களில் பலராலும் பகிரப்பட்டு வருகிறது.

 

வேலைவாய்ப்பிற்காக தமிழ்நாட்டை நோக்கி படையெடுக்கும் வட இந்திய தொழிலாளர்களின் எண்ணிக்கை நாளுக்கு நாள் அதிகரித்து வருகிறது. சென்னை, கோவை போன்ற பெரு நகரங்கள் மட்டுமல்லாமல் குக்கிராமங்கள் வரை வட இந்திய தொழிலாளர்கள் பல்வேறு இடங்களில் வேலை பார்த்து வருவது கடந்த பத்தாண்டுகளில் அதிகரித்துள்ளது.

 

வறுமை, வேலைவாய்ப்பின்மை போன்ற காரணங்களால் தமிழ்நாடு போன்ற வளர்ச்சியடைந்த மாநிலத்துக்கு வட இந்தியர்கள் வருகின்றனர். பெரிய நிறுவனங்கள் முதல் செங்கல் சூளைகள், சிறிய கடைகள் வரை கட்டுமானப் பணிகள் முதல் தூய்மைப் பணிகள், விவசாயப் பணிகள் வரை நீக்கம்ற நிறைந்திருக்கிறார்கள்.

 

 

வந்தாரை வாழ வைக்கும் தமிழ்நாடு என்று பெருமிதப்பட்டுக் கொள்வதில் தவறில்லை. ஆனால் இதில் தமிழகத்தின் தொழில், அரசியல், சமூக நீதி கட்டமைப்புகளை காலப்போக்கில் பதம் பார்க்கும் ஆபத்து இருப்பதாக சொல்கிறார்கள்.

 

வட இந்தியர்களின் வருகையால் தமிழத்தில் அடித்தட்டு மக்களின் வேலை வாய்ப்பு பறிக்கப்படுவதாக ஆரம்பம் முதலே குற்றச்சாட்டு எழுந்து வருகிறது. குறைந்த ஊதியத்தில் இவர்களை பணியமர்த்த முடியும் என்பதால் இங்குள்ள முதலாளிகள் வட இந்தியர்களுக்கு முன்னுரிமை கொடுக்கின்றனர்.

 

தமிழகத்தில் உயர்கல்வி பயின்று அதற்கேற்ற வேலைவாய்ப்புகளில் போய் அமர்பவர்கள் அதிகரித்துள்ளதால் கீழ்மட்ட வேலைகளைப் பார்க்க இங்கு ஆட்கள் போதுமானதாக இல்லை. எனவே வட இந்தியர்களை வேலைக்கு அமர்த்துவது தவிர்க்க முடியாதது என்பது முதலாளிகளின் வாதமாக உள்ளது.

 

ஓர் நிலப்பரப்பை, ஒரு பிராந்தியத்தை அதை சேர்ந்தவர்களால் மட்டுமே செழிப்பானதாக மாற்றிவிட முடியாது. சில நேரங்களில் வெளியிலிருந்து வருபவர்கள் அந்த பகுதியின் முன்னேற்றத்துக்கு மறைமுக காரணமாக இருந்திருக்கின்றனர். தமிழர்களும் உலகம் முழுக்க தொழில், வேலைவாய்ப்பிற்காக சென்றுள்ளனர். சிங்கப்பூரின் வளர்ச்சிக்கு இந்தியர்களின் குறிப்பாக தமிழர்களின் உழைப்பும் ஒரு காரணம். அரபு நாடுகளில் தமிழர்கள் கணிசமாக உள்ளனர். இந்தியாவில் மும்பை, கேரளா போன்ற இடங்களில் தமிழர்கள் தங்கள் தொழில் கட்டமைப்பை உருவாக்கியுள்ளனர்.

 

 

அப்படியிருக்க வட இந்தியர்களை அனுமதிப்பதில் என்ன தடை என்று கேட்கலாம். ஆனால் அவை ஒரு வரையறைக்கு உட்பட்டு இருக்க வேண்டும். மேற்சொன்ன பிற பகுதிகளிலும் அந்த வரையறை பேணப்படுகிறது. அவ்வாறு விட்டால் தமிழ் நிலப்பரப்பில் புதிய பிரச்சினைகளை உருவாக்கும் என்று எச்சரிக்கை மணி ஒலிக்கத் தொடங்கியுள்ளது.

 

“இப்படியே வந்து தங்கி விடுபவர்களை எத்தனை வருடங்களுக்கு அனுமதிப்பது? அவர்களுக்கு ரேஷன் கார்டுகள் வழங்கலாமா? வாக்காளர் அட்டைகள் வழங்கலாமா, கூடாதா? வடமாநில தொழிலாளர்களுக்கான சமூக உரிமை என்ன? தொழிலாளர் உரிமை என்ன? அரசியல் உரிமை என்ன? எது வழங்கலாம்? எது கூடாது என்பது குறித்து நம் அரசியல் கட்சிகளுக்கான தீர்மானகரமான கோரிக்கைகள் என்ன என்று மிகத் தீவிரமாக விவாதித்து முடிவு செய்ய வேண்டிய காலகட்டம் இது” என்று சமூகவலைதளங்களில் பலரும் கேள்வி எழுப்பி வருகின்றனர்.

 

வட இந்திய தொழிலாளர்கள் மொத்தம் எவ்வளவு பேர் தமிழகத்தில் பணியாற்றுகிறார்கள்? ஒவ்வொரு ஊரிலும் எவ்வளவு பேர் இருக்கிறார்கள் என்ற விவரம் தமிழக அரசிடம் உள்ளதா? என்று சமூகவலைதளங்களில் எழுந்துள்ள கேள்வி முக்கியமானது.

 

குறைந்தது இரண்டு கோடி பேர் இங்கே இருக்கலாம் என உறுதிப்படுத்தப்படாத தகவல் ஒன்று வலம் வருகிறது. தமிழ்நாட்டில் எட்டு கோடி பேர் உள்ள நிலையில் புதிதாக 2 கோடி பேர் உள்ளே நுழைகிறார்கள் என்றால் தமிழகம் பெரிய பிரச்சினையை எதிர்கொள்ளப்போகிறது என்று கூறப்படுவதில் உண்மை இல்லாமல் இல்லை. இவர்களுக்கான உணவு தேவை, குடிநீர் தேவை எல்லாம் இங்கே பூர்த்தி செய்யப்படுவது எப்படி?

 

இன்றைய தேதியில் அடித்தட்டு மக்களின் வேலைவாய்ப்பு பறிபோகிறது என்ற குரலை அரசு செவிகொடுத்து கேட்கவில்லை என்றால் சில ஆண்டுகள் கழித்து அனைத்து தரப்பிலிருந்தும் அந்த குரல்கள் கேட்கும். இப்போதே இங்குள்ள ரயில் நிலையங்கள், தபால் நிலையங்கள் என ஒன்றிய அரசின் நிறுவனங்களில் இந்தி பேசுபவர்கள் ஆக்கிரமித்துள்ளனர். அது மேலிருந்து தொடுக்கப்படும் தாக்குதல் என்றால் கீழிருந்து மற்றொரு தாக்குதல் வர உள்ளது.

 

இன்று பிழைப்புக்காக தமிழ்நாட்டிற்கு வந்தவர்கள் ஓரிரு தலைமுறைகள் இங்கே இருக்கும் பட்சத்தில் தமிழர்களின் வாழ்வாதாரங்கள் பங்கு போடப்படும். இங்கே வாக்காளர் அடையாள அட்டை பெற்று இந்தி பேசும் மக்கள் தமிழக வாக்காளர்கள் ஆகும் பட்சத்தில் தமிழகத்தின் அரசியல் அடியோடு மாற்றத்துக்கு உள்ளாகும். அது தமிழர்களுக்கு எதிரானதாக முடியும். உள்நாட்டு மோதலுக்குகூட வழிவகுக்கும் என்று பலரும் அச்சம் தெரிவிக்கின்றனர்.

 

எனவே தமிழக அரசு இந்த விவகாரத்தை உன்னிப்பாக கவனிக்க வேண்டும். எத்தனை கோடி பேர் இங்கே வந்துள்ளனர். அவர்களுக்கான உரிமைகள் என்னென்ன என்பது குறித்து தீர்க்கமான முடிவெடுக்க வேண்டும். கட்டுப்பாடுகளை அமல்படுத்த வேண்டும்.

 

இல்லையேல் தமிழக அரசியல் வரலாறும், பேணிக்காத்த சமூக நீதியும் பாதிப்புக்கு உள்ளாகும். இந்தி திணிப்பை எதிர்த்த மாநிலமான தமிழகத்தில் இந்தி பேசி வாக்கு சேகரிக்கும் நிலைக்கு ஆட்சியாளர்கள் தள்ளப்படுவர். மூன்றாவது மொழியாக தமிழை சேர்த்துக்கொள்ளுங்கள் என கெஞ்ச வேண்டிய நிலை ஏற்படலாம்..