சென்னையில் பல இடங்களில் கனமழை கொட்டி தீர்த்தது. இதனால், சாலைகள் மற்றும் தெருக்களில் மழைநீர் தேங்கியதால் மக்களின் இயல்பு வாழ்க்கை பாதிக்கப்பட்டுள்ளது. கனமழை காரணமாக மின்சாரம் தாக்கி 3 பேர் உயிரிழந்துள்ளனர். புளியந்தோப்பில் வட மாநில பெண், மயிலாப்பூரில் சிறுவன், ஒட்டேரியில் மூதாட்டி ஒருவரும் மின்சாரம் தாக்கி உயிரிழந்துள்ளனர்.

 

இதற்கு இரங்கல் தெரிவித்து காங்கிரஸ் எம்.பி., ராகுல் வெளியிட்ட அறிக்கையில் கூறியுள்ளதாவது: எனது எண்ணங்கள் அனைத்தும் தமிழக மக்களோடு உள்ளது. கனமழையால், தங்களது அன்புக்கு உரியவர்களை பறிகொடுத்த அனைவருக்கும் எனது ஆழ்ந்த இரங்கல்கள். தயவு செய்து அனைவரும் பாதுகாப்புடன் இருக்க வேண்டும். அரசின் வழிகாட்டுதல்களை பின்பற்ற வேண்டும். பத்திரமாக இருங்கள் என ராகுல் தெரிவித்துள்ளார்.

 

முன்னதாக அவர் வெளியிட்ட மற்றொரு அறிக்கையில் கூறியுள்ளதாவது: 2021ம் ஆண்டு இறுதிக்குள் மக்கள் அனைவருக்கும் இரண்டு டோஸ் தடுப்பூசி செலுத்தப்படும் என மத்திய அரசு வாக்குறுதி அளித்தது. இந்த வருடத்தின் இறுதி நாள் இன்று. இன்னும் நாட்டு மக்கள் பலருக்கு தடுப்பூசி செலுத்தப்படவில்லை. இன்னொரு பொய் வெளிப்பட்டு விட்டது. இவ்வாறு ராகுல் தெரிவித்துள்ளார்.