சசிகலா மீது தனக்கு சந்தேகம் இருப்பதாக போயஸ் கார்டன் ஜெயலலிதா வீட்டு முன் தீபா கூறியுள்ளார்.

 

ஜெயலலிதா மரணத்தில் சந்தேகம் இருப்பதாகவும் சசிகலாவிடம் விசாரணை நடத்த வேண்டும் என்றும் தீபா கோரிக்கை வைத்துள்ளார்.

 

போயஸ் கார்டன் ஜெயலலலிதா வீட்டு சாவி சென்னை உயர் நீதிமன்ற உத்தரவுப்படி தீபா, தீபக் ஆகியோரிடம் ஒப்படைக்கப்பட்டது. அதைத்தொடர்ந்து நேற்று மதியம் தீபா, தீபக் மற்றும் தீபா கணவர் ஆகியோர் வேதா இல்லத்தைத் திறந்து உள்ளே சென்று சுற்றிப் பார்த்தனர்.

 

 

 

வீட்டைத் திறந்து உள்ளே சுற்றிப் பார்த்தார். ஜெயலலிதா போல் பால்கனியில் நின்று கை அசைத்தார். அதன் பின் செய்தியாளர்களைச் சந்தித்த தீபா சசிகலா மீது தனக்கு சந்தேகம் இருப்பதாக வெடியை பற்ற வைத்தார்.

 

“இந்த வீட்டுக்குப் பெரிய வரலாறு உள்ளது. என் பாட்டி, அப்பா எல்லாரும் இங்குதான் வாழ்ந்தார்கள். எனது அப்பாவுக்குத் திருமணமான, பின்னும் அவர் தனியாக செல்லக்கூடாது என்று அத்தை விரும்பியதால் இங்குதான் வாழ்ந்தோம். அத்தை அரசியலில் வளர்ந்து முதல்வரான பிறகு சில மாற்றங்கள் ஏற்பட்டது.

 

அதன்பின் அத்தையைப் பார்க்க இங்கு வருவேன். அவர் மறைவுக்கு பிறகு இன்றுதான் வருகிறேன். அவர் மறைவெய்திய போது கூட என்னை உள்ளே அனுமதிக்கவில்லை. தற்போது இந்த வீட்டில் நிறைய மாற்றங்கள் ஏற்பட்டுள்ளது. இது அதிர்ச்சியாக உள்ளது. வீட்டை அலங்கரிப்பதில் அத்தை தனி ரசனை கொண்டவர். அவர் இருந்தபோது, இருந்த இண்டீரியர் டெக்கரேஷன் தற்போது இல்லை

வீடு உள்ளே எப்படி இருந்தது என்று எனக்குத் தெரியும். ஜெயலலிதா பயன்படுத்திய பொருட்களில் நிறையப் பொருட்கள் இல்லை. இந்த மாற்றத்துக்கு காரணம் சசிகலாவாகக் கூட இருக்கலாம். அத்தை வாழ்ந்ததற்கான அடையாளம் எதுவும் இல்லை. அவர் பயன்படுத்திய கட்டில் இல்லை” என்று கூறினார்.

 

2017ஆம் ஆண்டு வேதா இல்லத்தில் வருமான வரித்துறை சோதனை நடத்தி ஒரு அறையில் மட்டும் சீல் வைத்தது, அந்த சீல் உள்ளதா எனச் செய்தியாளர்கள் கேள்வி எழுப்பினர். அதற்கு பதிலளித்த தீபா, “வருமான வரி விவகாரம் தொடர்பாக வெளியில் என்ன செய்தி வருகிறதோ அதுமட்டும் தான் எனக்குத் தெரியும். சீல் வைக்கப்பட்டிருந்த அறைகளை அரசு அதிகாரிகள் திறந்திருக்கிறார்கள்” என்று கூறினார்.

தொடர்ந்து பேசிய தீபா, “ஜெயலலிதா பெயரில் அறக்கட்டளை தொடங்குவது இந்த வீட்டை வைத்து மட்டுமே கிடையாது. தீர்ப்பு வழங்கிய போது, அறக்கட்டளை தொடங்க வேண்டும் என்று நீதிபதிகள் சொன்னார்கள். அதன்படி நாங்கள் அறக்கட்டளை திறக்கப் போகிறோம்” என்றார்.

 

இந்த தீர்ப்பை வைத்து ஜெயலலிதாவின் அனைத்து சொத்துகளையும் கைப்பற்ற வேலைகளைச் செய்யப் போகிறீர்களா என்று செய்தியாளர்கள் கேள்வி எழுப்பினர். அதற்கு, “இந்த தீர்ப்பின் மூலம் அனைத்து சொத்துகளும், ஏற்கனவே எங்களுக்குக் கொடுக்கப்பட்டது. இனி தனியாகக் கேட்பதற்கு என்று எதுவும் இல்லை. 'இன்ஹெரிட்டன்ஸ்' என்ற அடிப்படையில் இந்த தீர்ப்பு கொடுத்திருக்கிறார்கள். எங்கள் பாட்டியால் வாங்கப்பட்ட சொத்துகள் இதில் கொஞ்சம் இருக்கிறது. அத்தை சினிமா துறையிலிருந்த போது தனிப்பட்ட முறையில் சொத்து வாங்கினார். ஆனால் வருமான வரித்துறை வழக்குகளில் எல்லாம் பொதுவாக இருப்பதால், அதுதொடர்பான அனைத்து வழக்குகளையும் க்ளியர் செய்ய வேண்டும்” என்று கூறினார்.

மேலும் அவர், “இந்த வீடு இவ்வளவு மோசமாக இருக்கும் என்று நான் நினைக்கவில்லை. முதலில் பராமரிப்பு பணிகள் மேற்கொள்ளப்பட வேண்டும். அதிமுக மேல்முறையீடு செய்யப் போவதாகக் கூறியுள்ளது. நாங்களும் சட்ட ரீதியாக எதிர்கொள்வோம். ஏனென்றால் என்னால் நேரடியாக அதிமுக தலைமையிடம் சென்று பேச முடியாது.

 

இந்த வீடு இருக்கும் சூழ்நிலையைப் பார்த்தால் எனக்குச் சந்தேகமாக இருக்கிறது. அத்தைக்கு என்ன ஆனது என விசாரிக்க வேண்டும். என்ன சிகிச்சை அளிக்கப்பட்டது என்று விசாரிக்க வேண்டும். சசிகலாவும் அவரது குடும்பத்தினரும், இந்த வீட்டில் ஆதிக்கம் செலுத்தி பாழ் படுத்தியிருக்கிறார்கள். சசிகலா மீது சந்தேகம் என்பது நிச்சயமாக இருக்கிறது. இப்போது இருக்கிற திமுக அரசிடம், ஜெயலலிதாவின் மரண வழக்கைத் முறையாக விசாரிக்க வேண்டும் என்று கோரிக்கை வைக்கிறேன். அத்தையின் மரணத்தின் மீதுள்ள சந்தேகத்தை, அவருடன் இருந்த சசிகலா கண்டிப்பாக விளக்கியிருக்க வேண்டும்.

 

 

 

ஜெயலலிதாவிடம் நெருங்க விடாமல் எங்களைத் தடுத்தவர் சசிகலா. இந்த சொத்து விவகாரம் தொடர்பாக சசிகலாவிடம் இருந்து எங்களுக்கு எந்த தொந்தரவும் ஏற்படவில்லை. வேதா இல்லத்திற்கு காவல்துறை பாதுகாப்பு வழங்க வேண்டும்” என கூறினார்.