தமிழக அரசு மற்றும் காவல் துறை குறித்து சர்ச்சைக்குரிய விதத்தில் வீடியோ, ட்விட்டரில் பதிவிட்டதாக யூ டியூபர் மாரிதாஸ் மதுரையில் கைது செய்யப்பட்டு நீதிமன்ற காவலில் சிறையில் அடைக்கப்பட்டார்.

 

 

 

வலதுசாரி ஆதரவாளராக அறியப்படும் மாரிதாஸ், சர்ச்சைகளுக்கு பெயர் போனவர். தமது யூ டியூப் பதிவுகளில் திமுகவையும். இடதுசாரிகளையும் அவர் தொடர்ந்து விமர்சித்து வருபவர்.

 

இந்த நிலையில், முதுகுளத்தூர் மணிகண்டன் இறந்த விவகாரம் குறித்து போலீசை சர்ச்சைக்குரிய வகையில் விமர்சித்து வீடியோ, ட்வீட் பதிவிட்டதாக யூடியூபர் மாரிதாஸ் மீது புகார் அளிக்கப்பட்டதாக தெரிகிறது.

 

இந்த புகாரின் பேரில் விசாரணைக்காக அவர் மதுரை கோ.புதூர் காவல் நிலையம் அழைத்து செல்லப்பட்டார். அதனை தொடர்ந்து அவர் மீது 2 பிரிவுகளின் கீழ் வழக்குப் பதிவு செய்யப்பட்டு கைது செய்யப்பட்டுள்ளார்.

 

“யூடியூபர் மாரிதாஸ் தமிழ்நாடு அரசு குறித்து சர்ச்சைக்குரிய வகையில் ட்விட்டரில் கருத்து பதிவு செய்துள்ளார்; அவர் மீது 2 பிரிவுகளின் கீழ் வழக்கு பதிவு செய்யப்பட்டு கைது செய்யப்பட்டுள்ளார்” என்று மதுரை மாநகர காவல் ஆணையர் பிரேம் ஆனந்த சின்ஹா தெரிவித்துள்ளார்.

 

 

முன்னதாக இன்று காலை, மாரிதாஸ் தமது ட்விட்டர் பக்கத்தில் பதிவிட்ட கருத்து பெரும் சர்ச்சையை ஏற்படுத்தியது. அந்த பதிவில், "திமுக ஆட்சியின் கீழ் தமிழகம் இன்னொரு காஷ்மீராக மாறுகிறதா?

 

மாரிதாஸ் ட்விட்

 

தேசத்துக்கு எந்த பெரிய துரோகத்தையும் செய்யக்கூடிய ஒரு கூட்டத்தை உருவாக்கி வைத்துக் கொள்ள இங்கே சுதந்திரம் இருக்கும் என்றால், அங்கே எந்த பெரிய சதி வேலை நடக்கவும் சாத்தியம் உண்டு. பிரிவினைவாத சக்திகள் ஒடுக்கப்பட வேண்டும்" என்று மாரிதாஸ் ட்விட்டரில் பதிவிட்டிருந்தார்

 

குன்னூர் அருகே நேற்று நடைபெற்ற ராணுவ ஹெலிகாப்டர் விபத்தில் முப்படைகளின் தலைமை தளபதி பிபின் ராவத் உள்ளிட்ட 13 பேர் மரணடைந்தனர். நாடு முழுவதும் இக்கோர விபத்து பெரும் அதிர்ச்சியை ஏற்படுத்தியிருக்கும் வேளையில், 'தமிழகத்தில் பெரிய சதி வேலை நடக்கவும் சாத்தியம் உண்டு' என்று மாரிதாஸ் பதிவிட்டிருந்தது பெரும் சர்ச்சையை ஏற்படுத்தியது.

 

 

இந்த சர்ச்சையை அடுத்து, தமது இந்த ட்விட்டர் பதிவை மாரிதாஸ் நீக்கிவிட்டார் என்பதும், அதற்குள் அவரது இந்த பதிவை 343 பேர் ரீ ட்விட் செய்துள்ளனர் என்பதும் குறிப்பிடத்தக்கது.