சொந்தக் குடிமக்களுக்கு கொரோனா தடுப்பூசி செலுத்துவதுடன், அண்டை நாடுகள் உள்ளிட்ட பிற நாடுகளுக்கும் தடுப்பூசிகளை இந்தியா வழங்கி வருகிறது. 70-க்கும் மேற்பட்ட நாடுகளுக்கு சுமார் 6 கோடி தடுப்பூசிகள் இந்தியாவால் வழங்கப்பட்டிருக்கின்றன.

 

 

கடந்த பிப்ரவரி மாதம் ஐ.நா. பாதுகாப்பு சபையில் பேசிய இந்திய வெளியுறவு மந்திரி எஸ்.ஜெய்சங்கர், ஐ.நா. அமைதிகாப்பு படை வீரர்களுக்கு 2 லட்சம் தடுப்பூசிகளை இந்தியா பரிசாக வழங்கும் என்று அறிவித்தார்.

 

அதன்படி, ஆக்ஸ்போர்டு-ஆஸ்ட்ராஜெனகாவின் கோவிஷீல்டு தடுப்பூசிகள், மும்பையில் இருந்து இன்று (மார்ச் 27) டென்மார்க் தலைநகர் கோபன்ஹேகன் அனுப்பப்படுகின்றன. அங்கிருந்து, பல்வேறு நாடுகளில் செயல்பட்டுவரும் ஐ.நா. அமைதிகாப்பு படைகளுக்கு துரிதமாக பகிர்ந்து வினியோகிக்கப்படும்.

 

அனைத்து ஐ.நா. அமைதிகாப்பு படை வீரர்களுக்கும் இரண்டு ‘டோஸ்’ போடுவதற்கு இந்தியாவின் 2 லட்சம் தடுப்பூசிகள் போதுமானதாகும்.

 

தற்போது உலகின் பல்வேறு நாடுகளில் ஐ.நா.வின் 12 அமைதிகாப்பு நடவடிக்கைகளில் 121 நாடுகளைச் சேர்ந்த 85 ஆயிரத்து 782 வீரர்கள் செயல்பட்டு வருகிறார்கள். பாரம்பரியமாக இந்த படையில் இந்திய வீரர்கள் அதிக எண்ணிக்கையில் இடம்பெற்று வருவது குறிப்பிடத்தக்கது.