'மறுபடியும் உதயசூரியன், இரட்டை இலைக்கு ஓட்டு போட்டீர்கள் என்றால், உங்கள் கைக்கு குஷ்டம் தான் வரும்,'' என, நாம் தமிழர் கட்சி தலைமை ஒருங்கிணைப்பாளர் சீமான் பேசினார்.

 

கள்ளக்குறிச்சி மாவட்டம், சின்னசேலம் பஸ் நிலையத்தில், சீமான், நேற்று பிரசாரம் செய்து பேசியதாவது: தி.மு.க., - அ.தி.மு.க., இவ்விரு கட்சிகளும் தமிழகத்தை பாலைவனமாக மாற்றியதை தவிர, வேறு ஒன்றும் செய்யவில்லை. உயிரைக் காக்கும் மருத்துவத்தை, தனியார் முதலாளிக்கு லாபம் ஈட்டும் தொழிலாக மாற்றியவர்கள் இவர்கள்.ஆற்று மணலை அள்ளி விற்று, பல்லாயிரம் கோடிகளை குவித்து உள்ளனர். உடலுக்கு எப்படி தோல் முக்கியமோ, அதேபோல் ஆற்றுக்கு மணல் முக்கியம். ஆற்றில் மணலை அள்ளிவிட்டால், ஆறு இறந்து விடும். தமிழகத்தில், 32 ஆறுகள் அழிந்துவிட்டன.

 

 

அடுத்து மலைகளில் உள்ள கற்களை, எம் - சாண்ட், மலை மணல் என்று நொறுக்குகின்றனர். நாங்கள், பெண்களுக்கு சம வாய்ப்பை கொடுத்துள்ளோம். தி.மு.க., மற்றும் அ.தி.மு.க., கட்சிகள் பெண்களுக்கு எத்தனை தொகுதி கள் ஒதுக்கியுள்ளன என்பதை நீங்களே ஒப்பிட்டு பாருங்கள். மறுபடியும் உதயசூரியன், இரட்டை இலைக்கு நீங்கள் ஓட்டு போட்டீர்கள் என்றால், உங்கள் கைக்கு குஷ்டம் தான் வரும். இவ்வாறு, அவர் பேசினார்.