மங்களூர் விமான நிலையத்தில் கண்டெடுக்கப்பட்ட மர்ம பையில் வெடிகுண்டு கண்டுபிடிக்கப்பட்டுள்ளது. வெடிகுண்டு இருந்த பையை மத்திய தொழிலக பாதுகாப்பு படையினர் பாதுகாப்பாக அகற்றியுள்ளனர்.
மங்களூர் சர்வதேச விமான நிலையத்தில், கேட்பாரற்ற நிலையில் மர்ம பை ஒன்று இருந்துள்ளது. இதுகுறித்து, பாதுகாப்பு பணியில் இருந்த மத்திய தொழில் பாதுகாப்பு படையினர், மங்களூர் பொலிஸாருக்கு தகவல் வழங்கியுள்ளனர்.
இதனையடுத்து விமான நிலையம் முழுவதும் அதிக அளவில் பொலிஸார் குவிக்கப்பட்டனர். 5 அடுக்கு வளையத்துக்குள் விமான நிலையம் கொண்டுவரப்பட்டது. மேலும் வெடிகுண்டு நிபுணர்களுக்கும் தகவல் தெரிவிக்கப்பட்டது.
சம்பவ இடத்திற்கு வந்த வெடிகுண்டு நிபுணர்கள், பையை சோதனை செய்ததில் வெடிகுண்டு இருந்தமை தெரியவந்துள்ளது.
இதனையடுத்து குறித்த பையை மீட்டு, வெடிகுண்டு மீட்பு வாகனத்தில் வைத்து, வாகனத்தை பாதுகாப்பான இடத்தில் நிறுத்தினர். பின்னர் வெடிகுண்டு செயலிழக்கச் செய்யப்பட்டது.
அந்த பகுதியில், பலத்த பாதுகாப்பு போடப்பட்டுள்ள நிலையில், மர்ம பை தொடர்பாக சி.சி.டி.வி. காட்சிகளை ஆய்வு செய்து வருகின்றனர்.
மேலும் மாநிலம் முழுவதும் உள்ள ஏனைய விமான நிலையங்களும் பாதுகாப்பு வளையத்திற்கு கொண்டுவரப்பட்டுள்ளன.