விசாரணைக்கு அழைத்துச் செல்லப்பட்ட இளைஞர் உயிரிழப்பு... காவல் நிலையத்தை சூறையாடிய மக்கள்!
25 May,2024
கர்நாடகாவில் விசாரணைக்கு அழைத்துச் செல்லப்பட்ட இளைஞர் இறந்து போனதால் ஏற்பட்ட ஆத்திரத்தில் அவரது உறவினர்கள் காவல் நிலையத்தை சூறையாடினர். இந்த தாக்குதலில் 11 போலீஸார் படுகாயமடைந்தனர்.
கர்நாடகா மாநிலம், தாவண்கெரேவில் உள்ள சன்னகிரி திப்புநகரைச் சேர்ந்தவர் ஆதில்(30). இவரை லாட்டரி விற்றது தொடர்பாக விசாரணைக்காக சன்னகிரி போலீஸார் நேற்று மாலை விசாரணைக்கு அழைத்துச் சென்றனர். அப்போது அவர் காவல் நிலையத்தில் திடீரென மயங்கி விழுந்தார். உடனடியாக அவரை மருத்துவமனைக்கு போலீஸார் கொண்டு சென்றனர். ஆனால், அங்கு சிகிச்சை பலனின்றி ஆதில் உயிரிழந்தார்.
போலீஸார் தாக்குதலால் ஆதில் இறந்து போனதாக அவர் குடும்பத்தினர், உறவினர்கள் குற்றம் சாட்டியதுடன், சன்னகிரி காவல் நிலையத்தை நேற்று நள்ளிரவு முற்றுகையிட்டனர். அத்துடன் காவல் நிலையம் வாசலில் நின்ற ஜீப் உள்ளிட்ட பத்துக்கும் மேற்பட்ட வாகனங்களை அடித்து உடைத்தனர்.
இதைத் தடுக்க வந்த போலீஸார் மீதும், காவல் நிலையம் மீதும் கற்களைக் கொண்டு தாக்குதல் நடத்தினர். இந்த தாக்குதலில் 11 போலீஸ்காரர்கள் காயமடைந்தனர். அவர்கள் மருத்துவமனையில் அனுமதிக்கப்பட்டுள்ளனர்.
இந்த வழக்கு குறித்து தாவண்கெரே மாவட்ட காவல் கண்காணிப்பாளர் உமா பிரசாந்தா கூறுகையில்," விசாரணைக்காக ஆதிலை போலீஸார் காவல் நிலையத்திற்கு அழைத்து வந்தனர். சிறிது நேரத்திலேயே அவர் சரிந்து விழுந்தார். உடனடியாக அவர் மருத்துவமனைக்கு கொண்டு செல்லப்பட்டும் உயிரிழந்தார். அவர் 6 நிமிங்கள் கூட காவல் நிலையத்தில் இல்லை.
ஆனால், இது காவல் நிலைய மரணம் என்று ஆதிலின் குடும்பத்தினர் கூறுகின்றனர். காவல் நிலையத்தில் கேமரா உள்ளது. இறந்தவரின் தந்தை புகார் அளித்துள்ளார். ஆதில் உடல் தாவண்கெரே அரசு மருத்துவமனைக்கு அனுப்பப்பட்டுள்ளது. நீதிபதி முன்னிலையில் விசாரணை நடத்தப்பட உள்ளது. இந்த வழக்குத் தொடர்பாக நான்கு வழக்குகள் பதிவு செய்யப்பட்டுள்ளன. கல்வீச்சில் 7 வாகனங்கள் மற்றும் 11 போலீஸார் காயமடைந்தனர். தற்போது நிலைமை கட்டுக்குள் உள்ளது" என்று கூறினார்.
காவல் நிலையம் மீது தாக்குதல் நடத்தப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.