எவரெஸ்ட் மசாலா குறித்த பரபரப்பு நீங்கும் முன் எம்டிஎச் என அறியப்படும் மஹாசியன் டி ஹட்டி என்ற பிரபல மசாலாப் பொருட்களும் சர்ச்சையில் சிக்கியுள்ளன.

 

 

இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) நன்கு அறியப்பட்ட இந்திய மசாலா பிராண்டுகளான எம்டிஎச் (MDH) மற்றும் எவரெஸ்ட் குழுமங்களின் தயாரிப்புகளில் புற்றுநோயை உண்டாக்கும் பூச்சிக்கொல்லி இருப்பதாகக் குற்றச்சாட்டுகள் எழுந்துள்ள நிலையில், அவற்றின் தரச் சோதனைகளைத் தொடங்கியுள்ளது என்று மூத்த அதிகாரியை மேற்கோள்காட்டி ராய்ட்டர்ஸ் தெரிவித்துள்ளது.

 

 

இந்த ஆய்வுகள் எத்திலீன் ஆக்சைடு இருப்பதைக் கண்டறிவதை நோக்கமாகக் கொண்டுள்ளன. இது புற்றுநோயை ஏற்படுத்தும் தீங்கு விளைவிக்கும் பூச்சிக்கொல்லியாகும். பல மசாலா கலவைகளில் எத்திலீன் ஆக்சைடு கண்டறியப்பட்டதன் காரணமாக ஹாங்காங் தனது எல்லைகளுக்குள் இந்த பிராண்டுகளின் விற்பனைக்கு சமீபத்தில் தடை விதித்ததைத் தொடர்ந்து இந்த நடவடிக்கை எடுக்கப்பட்டுள்ளது.

 

 

ஹாங்காங் சிறப்பு நிர்வாகப் பகுதியின் உணவுப் பாதுகாப்பு மையம், எம்டிஎச்-சின் 'மெட்ராஸ் கறிப் பொடி', 'சாம்பார் மசாலாப் பொடி' மற்றும் 'கறிப்பொடி' மற்றும் எவரெஸ்ட் குழுமத்தின் 'மீன் கறி மசாலா' ஆகியவற்றின் மாதிரிகளைச் சேகரித்து, பூச்சிக்கொல்லியின் தடயங்களைக் கண்டறிந்தது. இதன் விளைவாக, சிம் ஷா சூய் நகரில் உள்ள விற்பனையாளர்கள் விற்பனையை நிறுத்தவும், இந்த தயாரிப்புகளை அலமாரிகளில் இருந்து அகற்றவும் அறிவுறுத்தப்பட்டனர்.

 

ஹாங்காங் அதிகாரிகள் எத்திலீன் ஆக்சைட்டின் ஆபத்தை எடுத்துக்காட்டி, அதை குரூப் 1 புற்றுநோயாக வகைப்படுத்தியுள்ளனர். மேலும் பூச்சிக்கொல்லி எச்சங்கள் உள்ள உணவுகளை விற்பதற்கு அபராதம் விதிக்கப்படும் என எச்சரிக்கையும் விடுத்து சிங்கப்பூர் நடவடிக்கை எடுத்துள்ளது. அத்துடன் இறக்குமதியாளர்கள் சம்பந்தப்பட்ட பொருட்களை திரும்பப் பெறுமாறு அறிவுறுத்தியுள்ளதுடன், சம்பந்தப்பட்ட நுகர்வோர் மருத்துவ ஆலோசனையைப் பெறுமாறும் அறிவுறுத்தியுள்ளது.