சர்வதேச விமானத்தில் சக பயணிகளுடன் தகராறு செய்து, இருக்கைகளுக்கு சேதம் விளைவித்த இந்திய பயணியை டெல்லி போலீஸார் கைது செய்துள்ளனர்.

 

ஞாயிறு அன்று எகிப்து தேசம் கெய்ரோவிலிருந்து அந்நாட்டின் சர்வதேச விமானம் ஒன்று டெல்லி நோக்கி பயணத்தை தொடங்கியது. நள்ளிரவில் ஆகாய விமானம் பறக்கும்போது, ஆண் பயணி ஒருவர் சக பயணிகளிடம் முறைகேடாக நடந்துகொண்டதாக புகார் எழுந்தது.

 

சக பயணிகளின் புகாரை அடுத்து, விமான சிப்பந்திகள் அந்த பயணியை தட்டிக்கேட்டனர். ஆனால் அதன் பிறகும் அடங்காத அந்த பயணி விமானத்தின் இருக்கைகளை அடித்து, உடைத்து ஆர்ப்பாட்டம் செய்தார். இதனால் சக பயணிகள் மத்தியில் அச்சமும், அமைதியின்மையும் ஏற்பட்டது.

 

 

விமானத்தில் பயணிகள்

இந்த சம்பவம் தொடர்பாக எகிப்து விமானத்தின் விமானி, டெல்லி தரை கட்டுப்பாட்டு மையத்தை தொடர்புகொண்டு முறையிட்டார். அதிகாலை டெல்லி இந்திராகாந்தி விமான நிலையத்தை விமானம் எட்டியதும், விமான நிலைய பாதுகாப்பு பணிகளை மேற்கொள்ளும் மத்திய தொழிற்பாதுகாப்பு படையினர் அதிரடியாக விமானத்தில் புகுந்தனர்.

 

அதுவரை ரகளையில் ஈடுபட்டு வந்த இந்திய பயணியை விமான நிலையத்துக்கு அள்ளி வந்தனர். தங்களது விசாரணை நடைமுறைகள் முடித்ததும், டெல்லி காவல்துறையினரை அழைத்து ஆண் பயணியை ஒப்படைத்தனர். அதனை தொடர்ந்து அந்த பயணியை கைது செய்த டெல்லி போலீஸார், அவரது பின்னணி குறித்து மேலும் விசாரித்து வருகின்றனர்.