.

 

கடல் சீற்றத்தை பொருட்படுத்தாமல் பீச்சில் பாறையில் அமர்ந்திருந்த பெண்ணை ராட்சத அலை இழுத்துச் சென்ற சம்பவம் மும்பையில் பரபரப்பை ஏற்படுத்தியுள்ளது.

 

மும்பை: மும்பையில் உள்ள கடற்கரையில் இன்று நிகழ்ந்த பயங்கர சம்பவம் அனைவரையும் பதற வைத்துள்ளது. இயற்கையை நாம் சாதாரணமாக நினைத்தால் ஒரே நொடியில் நம் வாழ்க்கையே தலைகீழாக மாறிவிடும் என்பதற்கு இந்த சம்பவமே சிறந்த உதாரணமாக உள்ளது.

 

 

 

மும்பையின் ராபலி பகுதியைச் சேர்ந்தவர் முகேஷ் சோனார். இவரது மனைவி ஜோதி சோனார் (32). இவர்களுக்கு 6 வயதில் ஒரு பெண் குழந்தை உள்ளது. இவர்கள் கடந்த 9-ம் தேதி மும்பையில் உள்ள ஜூசு கடற்கரைக்கு சென்றுள்ளனர்.

 

 

 

அங்கும் கடல் சீற்றம் அதிகமாக இருந்துள்ளது. இருந்தபோதிலும், அவர்கள் கரைக்கு அருகே உள்ள பாறையில் அமர்ந்தனர். கடல் அலை அவர்கள் மீது வேகமாக அடித்து சென்றது. இதனால் உற்சாகமான அந்த தம்பதியர், அங்குள்ள ஒருவரிடம் தங்களை வீடியோ எடுக்குமாறு கூறியுள்ளனர். இதனைத் தொடர்ந்து, இருவரும் வீடியோவுக்கு போஸ் கொடுத்து கொண்டிருந்தனர்.

 

 

அப்போது யாரும் எதிர்பார்க்காத வகையில், ஒரு ராட்சத அலை அவர்கள் மீது விழுந்தது. அடுத்த நொடியே அது ஜோதி சோனாரை அப்படியே வாரி கடலுக்குள் கொண்டு சென்றது. கண் முன்னே தாய் அலையில் அடித்துச் செல்லப்படுவதை பார்த்த அவரது 5 வயது மகள், "மம்மி.. மம்மி.." என அபயக்குரல் எழுப்பினாள்.

 

அவரது கணவரும் பதறியடித்து கடலை நோக்கி ஓடிய போதும், ஜோதி சோனாரை காப்பாற்ற முடியவில்லை. தகலறிந்த தீயணைப்புப் படையினர் அங்கு வந்து மீட்புப் பணியில் ஈடுபட்டனர். எனினும், ஜோதியின் உயிரற்ற சடலத்தைதான் அவர்களால் மீட்க முடிந்தது. இந்நிலையில், ஜோதியை ராட்சத அலை அடித்து செல்லும் வீடியோ சமூக வலைதளங்களில் தீயாக பரவி வருகிறது.