வார விடுமுறை நாட்களில் பெரும்பாலானோர் பொழுதுபோக்குக்காக திரையரங்குகளுக்கு படம் பார்க்கச் செல்வார்கள். இன்னும் சிலரோ வார நாட்களிலேயே இரவு நேரங்களிலோ அல்லது தங்களுடைய ஃபிரீ டைகளிலேயோ படம் பார்க்கச் செல்வார்கள். படம் பார்க்கச் செல்பவர்கள் டிக்கெட் ஒன்றுக்கு 120 ரூபாய் முதல் 150 ரூபாய் வரை செலவழிப்பார்கள். ஆனால் அவர்களின் பெரிய பிரச்சினையே டிக்கெட் விலையை விட சிற்றுண்டி விலை அதிகம் என்பது தான்.

.

பொதுவாகவே தியேட்டர்களுக்கு உள்ளே விற்பனை செய்யப்படும் உணவுப் பொருட்களின் விலை மிகவும் விலை உயர்ந்ததாக இருக்கும். சொல்லப்போனால் டிக்கெட் செலவை விட ஸ்நாக்ஸ் செலவு பல மடங்கு அதிகமாக இருக்கும். அதேபோல, வெளியில் இருந்தும் உணவுப் பொருட்களை உள்ளே கொண்டு செல்ல அனுமதிக்க மாட்டார்கள். இது அவர்களுக்கு வருமானம் தரும் விஷயம் என்பதால் வாடிக்கையாளர்கள் நலனில் இதை விட்டுக் கொடுப்பது இல்லை.

 

 

இந்நிலையில், தியேட்டர்களில் விற்பனை செய்யப்படும் உணவுப் பொருட்களின் விலை தற்போது குறைந்துள்ளது. இதுகுறித்த அறிவிப்பை PVR சினிமாஸ் நிறுவனம் வெளியிட்டுள்ளது. இனிமேல், PVR திரையரங்குகளில் திரைப்படம் பார்க்கும்போது விலை உயர்ந்த பாப்கார்ன் வாங்கத் தேவையில்லை. ஏனென்றால் அரசாங்கம் அதற்கான நடவடிக்கையை எடுத்துள்ளது.

 

மல்டிபிளக்ஸ் சங்கிலி தொடர் நிறுவனமான PVR ஐநாக்ஸ் (INOX) உணவு மற்றும் பானங்களின் விலையை 40 சதவீதம் வரை குறைத்துள்ளது. முன்னதாக, இந்நிறுவனம் அதன் விலைகள் குறித்து சமூக ஊடகங்களில் பல்வேறு எதிர்ப்புகளை எதிர்கொள்ள வேண்டியிருந்தது. திங்கள் முதல் வியாழன் வரை காலை 9 மணி முதல் மாலை 6 மணி வரை ரூ. 99 விலையில் உணவு சேர்க்கைகளை அறிமுகப்படுத்தியதாக நிறுவனம் தெரிவித்துள்ளது. இது தவிர, வார இறுதி நாட்களில், பாப்கார்ன் மற்றும் பெப்சிக்கு சிறப்பு சலுகைகள் அறிவிக்கப்பட்டுள்ளன.

 

 

 

வார இறுதியில் திரைப்படம் பார்ப்பவர்கள் கவர்ச்சிகரமான விலையில் உள்ள 'குடும்ப உணவு சேர்க்கை' உட்பட 'அன்லிமிடெட் பாப்கார்ன்' சலுகையைப் பெறலாம். இதன் மூலம் உணவு மற்றும் பானங்களின் விலை 40 சதவீதம் வரை குறையும். பிவிஆர் ஐநாக்ஸின் செயல் இயக்குநர் சஞ்சீவ் குமார் இதுகுறித்து கூறுகையில், எங்களின் உணவு மற்றும் பானங்களின் விலை நிர்ணய உத்தி தொடர்பான நுகர்வோரின் கருத்துகளை நாங்கள் நன்றாகக் கேட்டு வருகிறோம். எனவே மலிவு விலையில் இவற்றை விற்பனை செய்யும் சலுகைகளை உருவாக்கியுள்ளோம். திரைப்படம் பார்ப்பவர்களுக்கு இது மிகவும் பிடிக்கும்” என்று கூறியுள்ளார்.

 

 

 

சமீபத்தில் நடைபெற்ற ஜிஎஸ்டி கவுன்சிலின் 50ஆவது கூட்டத்தில் திரையரங்குகளில் கிடைக்கும் உணவுப் பொருட்களின் மீதான ஜிஎஸ்டியை குறைக்க முடிவு செய்யப்பட்டுள்ளது. திரையரங்குகளில் கிடைக்கும் உணவு மற்றும் பானங்கள் மீதான ஜிஎஸ்டி வரி 18 சதவீதத்தில் இருந்து 5 சதவீதமாக குறைக்கப்பட்டுள்ளது. இதையடுத்து திரையரங்குகளில் உணவுப் பொருட்களின் விலை குறையத் தொடங்கியுள்ளது.