பாஜக-வை விட குறைந்த வாக்குகள் பெற்றால் கட்சியை கலைத்து விடுகிறேன் என நாம் தமிழர் கட்சியின் தலைமை ஒருங்கிணைப்பாளர் சீமான் ஆவேசமாகப் பேசியுள்ளார்.

 

 

சி.பா. ஆதித்தனாரின் நினைவுநாளை ஒட்டி இன்று காலை சென்னை, எழும்பூரில் உள்ள அவரது சிலைக்கு நாம் தமிழர் கட்சி சார்பில் மாலை அணிவித்து மரியாதை செலுத்தினார் சீமான். பின்பு செய்தியாளர்களை சந்தித்துப் பேசினார்.

 

 

அப்போது பேசிய அவர், “மோடி தமிழர்களை திருடர்களைப் போல சித்தரித்துப் பேசுகிறார். தென்மாவட்டங்களில் பாஜக தவிர்க்க முடியாத சக்தி என அண்ணாமலை நம்புகிறார்.

 

 

நான் கேட்கிறேன். தென் மாவட்டங்களில் தனித்து நிற்கும் துணிவு பாஜகவிற்கு இருக்கிறதா? தேர்தல் முடிவு ஜூன் 4ம் தேதி வெளியாகும். அப்போது எல்லாம் எல்லாருக்கும் தெரிந்து விடும். பாஜக பெறப்போகும் வாக்கு சதவீதமும் தெரிந்து விடும்.

 

 

யாருடனும் கூட்டணி வைக்காமல் தனித்து நின்று பாஜக பெறும் வாக்கு சதவீதம் நாம் தமிழர் கட்சியின் வாக்கு சதவீதத்தை விட அதிகமாக இருந்தால், நான் கட்சியை கலைத்து விடுகிறேன்” என்றார். நடந்து முடிந்த மக்களவை தேர்தலில் யாருடனும் கூட்டணி வைக்காமல் தனித்து தேர்தலை சந்தித்தது நாம் தமிழர் கட்சி என்பது குறிப்பிடத்தக்கது.