விஜய் டிவியில் வெளியாகும் பெரும்பாலான சீரியல்கள் அனைத்தும் ரசிகர்கள் மத்தியில் பிரபலமானவை. அந்த வகையில் ரசிகர்கள் மத்தியில் பெரும் வரவேற்பை பெற்ற ஈரமான 'ரோஜாவே சீசன் 2' இயக்கிய இயக்குனர் தாய் முத்துசெல்வம் திடீரென மரணமடைந்துள்ள சம்பவம் ரசிகர்கள் மத்தியில் அதிர்ச்சியை ஏற்படுத்தியுள்ளது. அவருக்கு சின்னத்திரை பிரபலங்கள் பலரும் இரங்கல் தெரிவித்து வருகின்றனர்.

 

 

 

கடந்த 2009 ஆம் ஆண்டு எஸ்.ஜே.சூர்யா நடிப்பில் வெளியான 'நியூட்டனின் மூன்றாம் விதி' படத்தை இயக்கியவர் தாய் செல்வம். தொடர்ந்து 2017 ஆம் ஆண்டு வெளியான விஜய் டிவியின் மௌனராகம் சீரியல் மூலம் சின்னத்திரையில் தொடர்களை இயக்கிய இவர், ஈரமான ரோஜாவே நாம் இருவர் நமக்கு இருவர் உள்ளிட்ட தொடர்களை இயக்கியுள்ளார்.

 

 

 

இவர் இயக்கிய மௌனராகம் சீரியல் 863 எபிசோடுகள் சென்ற நிலையில் கடந்த 2018 ம் ஆண்டு வெளியான நாம் இருவர் நமக்கு இருவர் சீரியல் 579 எபிசோடுகள் வரை சென்றது. ஆனால் கொரோனா தொற்று பாதிப்பு காரணமாக இந்த சீரியல் பாதியில் நிறுத்தப்பட்டு நாம் இருவர் நமக்கு இருவர் சீசன் 2 என்ற பெயரில் புதிய சீரியல் தொடங்கப்பட்டது.

 

 

 

மேலும், காத்து கருப்பு, கல்யாணம் முதல் காதல் வரை, பாவம் கணேசன் உள்ளிட்ட தொடர்களையும் இவர் இயக்கியுள்ளார். கடந்த சில நாட்களாக உடல் நலக் குறைவு காரணமாக தனியார் மருத்துவமனையில் அனுமதிக்கப்பட்டு சிகிச்சை பெற்று வந்தார் தாய் செல்வம். இந்நிலையில் சிகிச்சை பலனளிக்காமல் இன்று உயிரிழந்துள்ளார்.

 

 

தாய் செல்வம் இயக்கிய கல்யாணம் முதல் காதல் வரை தொடரில் நாயகியாக நடித்து புகழ் பெற்ற நடிகை பிரியா பவானி ஷங்கர், தனது ட்விட்டர் பக்கத்தில் தாய் செல்வம் மறைவிற்கு இரங்கல் தெரிவித்துள்ளார்.