தமிழ் சினிமா மட்டுமல்லாது தற்போது உலக சினிமாவிலேயே பிரபலமான நடிகராகிவிட்டார் தனுஷ். 17 வயது பள்ளி பருவத்தில் துள்ளுவதோ இளமை என்ற படத்தின் மூலம் தமிழ் சினிமாவில் எட்டி பார்த்த தனுஷ் படிப்படியாக உயர்ந்து தற்போது நடிப்பில் விஸ்வரூபம் எடுத்துள்ளார்.

 

 

துள்ளுவதோ இளமை, காதல் கொண்டேன் ஆகிய படங்கள் இவரை சிறந்த நடிகராக ரசிகர்களுக்கு காட்ட , திருட திருடி படம் இவருக்கு கமற்சியால் ஹீரோ என்ற அங்கீகாரத்தை கொடுத்தது. பின்பு வெற்றிமாறன் உடன் கூட்டணி அமைத்த தனுஷ் தன் திரைவாழ்க்கையில் அடுத்தகட்டத்துக்கு சென்றார்.

 

பொல்லாதவன், ஆடுகளம் , அசுரன், வடசென்னை ஆகிய படங்கள் இவரின் நடிப்பு திறமைக்கு சரியான தீனியாக அமைந்தது. குறிப்பாக ஆடுகளம் மற்றும் அசுரன் படத்திற்காக சிறந்த நடிகருக்கான தேசிய விருதை தட்டி சென்றார் தனுஷ்.

 

 

 நடிகர் மட்டுமல்லாது பாடலாசிரியர், இயக்குனர், தயாரிப்பாளர், பாடகர் என பன்முகத்திறன் கொண்ட தனுஷ் தன் ஆரம்பகால திரைவாழ்க்கையில் நிறைய விமர்சனங்களை சந்தித்தார.

 

இந்நிலையில் இவர் சினிமாவிற்கு வந்தது எப்படி என பேசிய பேட்டி ஒன்று தற்போது வைரலாகிவருகிறது. அதில் தான் நடிப்பில் எந்த வித ஆர்வமும் இல்லாமல் இருந்ததாகவும், என் அப்பாதான் என்னை ஒரு நடிகனாக்க ஆசைப்பட்டதாகவும் தெரிவித்திருக்கிறார். மேலும் என் உடல் வாகிற்கு நடிப்பு சுத்தமாக செட் ஆகாது என்று சொன்னேன், ஆனால் என் அப்பாதான் எனக்குள் ஒரு நடிகன் இருக்கிறான் என்பதை கண்டுபிடித்து என்னை நடிக்கவைத்தார். அவருக்கு எப்படி நான் நடிகனாவேன் என்ற நம்பிக்கை வந்தது என எனக்கு இன்றுவரை தெரியவில்லை.

 

 

குறிப்பாக சொல்லப்போனால் என் அப்பா கஸ்தூரிராஜா வற்புறுத்தியதால் தான் நான் நடிக்கவந்தேன் என்று கூறியிருக்கிறார். சினிமா துறையில் ஒரு நடிகனாக மட்டுமில்லாது பன்முகத்திறன் கொண்டவராய் பாலிவுட், ஹாலிவுட் என கலக்கிவரும் தனுஷ் உள்ளே ஒரு சிறந்த நடிகர் இருக்கிறார் என்று கண்டறிந்த கஸ்தூரி ராஜாவை ரசிகர்கள் அனைவரும் பாராட்டிவருகின்றனர். தற்சமயம் இந்த வீடியோ சமூகத்தளங்களில் அதிகம் பகிரப்பட்டுவருவது குறிப்பிடத்தக்கது.