என் படம் வெளியாகாமல் இருக்க, ரொம்ப பிரச்னை செய்கின்றனர்,'' என, நடிகர் சிலம்பரசன் அழுதபடி பேசினார்.

சிலம்பரசன், எஸ்.ஜே. சூர்யா, கல்யாணி பிரியதர்ஷன் நடித்த மாநாடு படத்தை வெங்கட்பிரபு இயக்க, யுவன்சங்கர் ராஜா இசை அமைத்துள்ளார். இப்படத்தின் இசை வெளியீட்டு விழா, நேற்று சென்னையில் நடந்தது. நிகழ்ச்சியில் பேசிய சிலம்பரசன் கண்ணீர் விட்டு அழ, அவரை படக்குழுவினர் தேற்றினர்.

சிலம்பரசன் பேசியதாவது:என் படம் என்றாலே பிரச்னை என்றாகி விட்டது. என்னை சுற்றி நிறைய பேர் பிரச்னை செய்கின்றனர். இதையெல்லாம் தாக்குப்பிடித்து, மாநாடு படத்தை தயாரிக்க சுரேஷ் காமாட்சி முன்வந்துள்ளார். நீண்ட இழுபறிக்கு பின் வெங்கட்பிரபு இயக்கத்தில் நடித்துள்ளேன். கதையின் ஒரு வரி எனக்கு மிகவும் பிடித்தது. ஒரு இனத்தின் மீதான வீண் பழியை தட்டிக் கேட்க வேண்டும் என எண்ணியே, இதில் நடித்தேன். படக்குழுவினர் அனைவரும் கஷ்டப்பட்டே படத்தை முடித்தோம்; அனைவருக்கும் நன்றி.

படம் வெளியான பின், எஸ்.ஜே.சூர்யாவை பிடிக்கவே முடியாது. நடிப்பில் பிச்சு உதறி விட்டார். யுவனுக்கும் எனக்கும் நல்ல பொருத்தம் இருக்கிறது. எவ்வளவு தொல்லை கொடுத்தாலும் தாங்குகிறார். அவரது நட்சத்திரம், ராசி கிடைத்தால் அதை போலவே எனக்கு பெண் பார்க்க சொல்வேன். நிறைய பிரச்னைகளை சந்தித்து விட்டேன். அதையெல்லாம் நான் பார்த்துக் கொள்கிறேன். என்னை மட்டும், ரசிகர்களாகிய நீங்கள் பார்த்துக் கொள்ளுங்கள்.இவ்வாறு அழுதபடி சிலம்பரசன் பேசினார்.