கொரட்டல சிவா இயக்கத்தில் சிரஞ்சீவி நாயகனாக நடித்து வரும் படத்தில் காஜல் அகர்வாலுக்கு வாய்ப்பு கிடைத்ததால் தான் அவர் உதயநிதி ஸ்டாலின் படத்திலிருந்து விலகி விட்டதாக கூறப்படுகிறது

சீரஞ்சீவியுடன் நடிப்பதற்காக உதயநிதி ஸ்டாலின் படத்திலிருந்து நடிகை காஜல் அகர்வால் விலகியிருப்பதாக தகவல்கள் வெளியாகியுள்ளன.

தமிழ் மற்றும் தெலுங்கில் முன்னணி நடிகையாக வலம் வருபவர் காஜல் அகர்வால். கடைசியாக தமிழில் இவர் நடித்த கோமாளி திரைப்படம் ரசிகர்களிடையே நல்ல வரவேற்பைப் பெற்று ஹிட் அடித்தது. இந்தப் படத்தை அடுத்து கமல்ஹாசன் உடன் இந்தியன் 2 படத்தில் நடித்து வருகிறார். அதேபோல் இவர் நடிப்பில் உருவான பாரிஸ் பாரிஸ் திரைப்படத்தின் போஸ்ட் புரொடக்‌ஷன் பணிகளும் நடைபெற்று வருகின்றன.

இந்நிலையில் உதயநிதி ஸ்டாலினுடன் நடிக்க நடிகை காஜல் அகர்வால் ஒப்பந்தம் செய்யப்பட்டதாகவும், அதற்காக அவருக்கு முன் பணம் வழங்கபட்டதாகவும் தெரிகிறது. ஆனால் அந்தப் படத்திலிருந்து காஜல் அகர்வால் விலகிவிட்டதாகவும், அதற்காக பெறப்பட்ட முன் பணத்தை திருப்பிக் கொடுத்து விட்டதாகவும் கூறப்படுகிறது.

இதற்கு காரணம், கொரட்டல சிவா இயக்கத்தில் சிரஞ்சீவி நாயகனாக நடித்து வரும் படத்தில் காஜல் அகர்வாலுக்கு வாய்ப்பு கிடைத்ததால் தான் அவர் உதயநிதி ஸ்டாலின் படத்திலிருந்து விலகி விட்டதாக கூறப்படுகிறது. எனினும் இதுகுறித்த அதிகாரப்பூர்வ தகவல்கள் எதுவும் இதுவரை வெளியிடப்படவில்லை.