கொரோனா வைரஸ் தொற்றினை முழுமையாக இல்லாதொழிக்க வேண்டுமாயின் அதற்கு சுகாதாரம் ஒன்றே, தற்போதைய மருந்தென இயக்குனர் பாரதிராஜா தெரிவித்துள்ளார்.
இந்தியாவிலும் கொரோனா வைரஸ் தொற்றின் தாக்கம் நாளுக்கு நாள் அதிகரித்து வருகின்றது.
இந்நிலையிலேயே அவர் வெளியிட்டுள்ள அறிக்கையில் இவ்வாறு தெரிவித்துள்ளார்.
குறித்த அறிக்கையில் அவர் மேலும் கூறியுள்ளதாவது, “என் இனிய தமிழ் மக்களே, இயற்கைக்கும், விஞ்ஞானத்திற்கும் நடக்கும், போராட்ட யுத்தத்தில், பல சூழ்நிலை காலக்கட்டங்களில் மிகக் கொடிய அபாய தொற்று நோய்களை கண்டது, நம் பாரத பூமி.
அதாவது நிபா வைரஸ், சிக்கன்குனியா, டெங்கு, பன்றிக்காய்ச்சல், ப்ளேக்நோய், ஆந்த்ராக்ஸ், எச்.ஐ.வி. என பல ஒட்டுண்ணிகள் நம் தேசத்தை அச்சுறுத்தியமையை நாம் அறிந்தோம், கடந்தும் வந்தோம்.
அதேபோன்று வளரும், விஞ்ஞானத்தில் கொரோனா போன்ற வைரஸ்கள் ஆச்சிரியமானவை. தனிமனித சுகாதாரமே, தேச நலன் என பிரதமர் மோடியின் ஊரடங்கு உத்தரவிற்கும், விழிப்புணர்வு ஏற்பாட்டிற்கும், கைகொடுப்போம்.
நம் தமிழக அரசின் முயற்சியின் வேகங்களும், பாரட்டுக்குறியவை.
இன்று ஒரு நாள் சூரிய ஒளி படாமல் தங்களை பாதுகாத்து கொள்ளுங்கள். எதிர்ப்பு சக்தியால், பல போராட்டங்களை வென்றவர்கள் நாம். உடல் எதிர்ப்பு சக்தியால் கொரோனாவை கொன்று, விரட்டுவோம்.
சுகாதாரம் ஒன்றே, தற்போதைய மருந்து’ என குறித்த அறிக்கையில் அவர் குறிப்பிட்டுள்ளார்.

 

கொரோனா உலகின் பல நாடுகளையும் பீதியடைய செய்து வரும் நிலையில் இது தொடர்பான விழிப்புணர்வு நடவடிக்கைகளில் பல பிரபலங்களும் ஈடுபடுத்தப்பட்டு வருகின்றனர். அது மட்டுமல்லாமல் தாமாகவே முனைவந்து பலர் விழிப்புணர்வு நடவடிக்கைகளில் ஈடுபட்டு வருகின்றனர்.
ஏற்கனவே நடிகை த்ரிஷா மற்றும் நகைச்சுவை நடிகர் யோகி பாபு ஆகியோர் குறித்த விழிப்புணர்வு பிரசாரங்களில் ஈடுபடுத்தப்பட்டுள்ளனர்.
இந்நிலையில், நடிகரும் மக்கள் நீதி மய்யத்தின் தலைவருமான உலக நாயகன் கமல்ஹாசன் விழிப்புணர்வு காணொளி ஒன்றினை வெளியிட்டுள்ளார்.
கொரோனா வைரஸ் தாக்கம் தொடர்பாக பேசும் குறித்த காணொளியானது, குறித்த வைரஸ் தாக்கத்தில் இருந்து எவ்வாறு விலகி இருப்பது என்பது பற்றி மக்களுக்கு அறிவுறுத்துவதாக அமைந்துள்ளது.
அத்துடன் விலகி இருத்தலும், அத்தியாவசிய தேவைகள் ஏற்பட்டாலன்றி பயணங்களை தவிர்த்துக்கொள்ளுவதுமே குறித்த வைரஸ் தாக்கத்தில் இருந்து தனி நபரையும், சமூகத்தையும் காப்பாற்றுவதற்கான முக்கிய விடயங்கள் என கமல் அக்காணொளியில் விளக்கியுள்ளமை குறிப்பிட்டுள்ளது.