தமிழ் திரையுலகில் முன்னணி நகைச்சுவை நடிகராக இருக்கும் யோகிபாபு கதாநாயகனாக இல்லாமல் கதையின் நாயகனாக வருடத்திற்கு ஒரு திரைப்படத்தில் மட்டுமே நடிப்பேன் எனக் கூறியுள்ளார்.
தமிழ் திரைப்படவுலகில்   முன்னணி நகைச்சுவை நடிகராக உயர்ந்துள்ள யோகிபாபு, ரஜினி,  விஜய், அஜித் உள்ளிட்ட முக்கிய நட்சத்திரங்களுடன் இணைந்து நடித்துள்ளார்.
இந்நிலையில், தனது திரைவாழ்க்கை குறித்து கருத்து தெரிவித்துள்ள அவர்,  “திரையுலகுக்கு நான் அறிமுகமாகி நகைச்சுவை நடிகராக பிரபலமானதும் தொடர்ந்து இரவு-பகல் பார்க்காமல் வேலை செய்தேன்.
இதனால் என் தூக்கம் போனது. களைப்பாக உணர்ந்தேன். கண்கள் தூக்கத்துக்கு ஏங்கின. உடல் நலம் பாதிக்கப்பட்டது. அதனால்,  இப்போது இரவு-பகலாக நடிப்பதில்லை. கதாநாயகனாக அல்ல,  கதையின் நாயகனாக வருடத்துக்கு ஒரு படம் நடிப்பேன். மற்ற படங்களில்,  நகைச்சுவைக்கு முக்கியத்துவம் கொடுத்து நடிப்பேன்” எனக்  கூறியுள்ளார்.