ஹைதராபாத்: தெலுங்குப் படம் ஒன்றின் ட்ரெய்லர் வெளியீட்டு விழா மேடையில், நடிகை காஜல் அகர்வாலை அப்படத்தின் ஒளிப்பதிவாளார் முத்தமிட்டதால் சர்ச்சை எழுந்துள்ளது. 

தமிழில் துப்பாக்கி, விவேகம் மற்றும் மெர்சல் உள்ளிட்ட பல படங்களில் நடித்துள்ள காஜல் அகர்வால் தெலுங்கிலும் முன்னணி கதாநாயகியாக இருக்கிறார். நடிகர் பெல்லம் கொண்டா சீனிவாஸ், காஜல் அகர்வால் மற்றும் மெஹ்ரின் ஆகியோர் நடித்துள்ள கவசம் என்ற தெலுங்கு படத்தின் டிரெய்லர் வெளியீட்டு விழா ஹைதராபாத்தில் சமீபத்தில் நடந்தது. 
அந்த விழா மேடையில் காஜல் அகர்வால் பேசிக்கொண்டு இருந்தபோது, அருகில் நின்று கொண்டிருந்த அந்தப் படத்தின் ஒளிப்பதிவாளர் சோட்டா கே.நாயுடு திடீரென்று காஜலின் அருகில் சென்று காஜலை கட்டிப்பிடித்து அவரது கன்னத்தில் முத்தமிட்டார். 
இதை எதிர்பாராத காஜல் அகர்வால் சமாளித்துக் கொண்டு சிரித்தபடி தொடர்ந்து பேச ஆரம்பித்தார்.  ஆனாலும் ஒளிப்பதிவாளரின் செயல் பார்வையாளர்களுக்கு முகச்சுளிப்பை  ஏற்படுத்தியது. 
சமூக வலைத்தளங்களிலும் இது பரவலான விமர்சனங்களை ஏற்படுத்தி உள்ளது. ஒரு பெண்ணின் அனுமதி இல்லாமல் அவரை முத்தமிட்டது முறையற்ற செயல் என்ற ரீதியில் ரசிகர்கள் தொடர்ந்து கருத்துக்களை பகிர்ந்து வருகிறார்கள்.