தமிழ் நடிகையரில் வெகு சிலர் மட்டுமே, எந்த ஒரு விஷயத்தையும் எளிதாக கடந்து, அடுத்தடுத்த நிலைக்கு தன்னை ஆட்படுத்தி கொள்வர். அந்த வகையில், தன்னை பற்றி வரும், காதல் முதல், கார் விமர்சனம் வரை, எதைப் பற்றியும் பெரிதாக அலட்டிக் கொள்ளாதவர், அமலாபால். அவர் நடிப்பில் அடுத்து வெளிவரவுள்ள திருட்டுப் பயலே - 2 பற்றியும், தன்னைப் பற்றியும், அவர் பேசுகிறார்:

திருட்டு பயலே - 2வில் உங்க ரோல்?

இந்த படத்தில், என் கேரக்டர் பெயர் அகல்விளக்கு. மூக்குத்தி, பாவாடை, தாவணி, புடவையில் வரும், அம்சமான காரைக்குடி பெண்ணாக இதில் நடித்துள்ளேன். வசிக்கும் வீடு முதல், கட்டும் புடவை வரை, எல்லாவற்றையும், கலர் புல்லாக வைத்துக் கொள்ள விரும்பும் கேரக்டராக நடித்து உள்ளேன். சமூக வலைதளங்களில், பிசியாக இருக்கும் பலரது வாழ்க்கையை, ஒளிவு மறைவில்லாமல் சொல்லும் படமாகவும், அதனால் ஏற்படும் பாதிப்புகளை சொல்லும் படமாகவும் இது இருக்கும். இதை, குழந்தைகள் முதல், பெரியவர்கள் வரை, அனைவரும் பார்க்கும் படமாக, சுசி கணேசன் இயக்கியுள்ளார்.

இந்த படத்துக்காக மூக்குத்தி குத்தி, உங்க மூக்கே புண்ணாகி விட்டதாமே?

எந்த படத்தில் நடித்தாலும், நம், லுக் கொஞ்சம் புதிதாக இருக்க வேண்டுமென நினைப்பேன். அதுபோல், இந்த படத்தில் வரும் அகல் விளக்கு கேரக்டருக்கு, மூக்குத்தி அணிந்தால் நன்றாக இருக்கும் என நினைத்து, நானே எடுத்த முடிவு தான், அது. மூக்கு குத்தியதில், சிறிய காயம் ஏற்பட்டு, அப்புறம் சரியாகி விட்டது. இந்த படத்துக்காக, சொந்த குரலில் பேசியுள்ளேன்.

உங்கள் விருப்பமான உணவு?

எந்த உணவுமே, அம்மா கையில் சாப்பிடுவது மாதிரி வராது. வெளியூர் படப்பிடிப்புகளில் இருக்கும்போது, வீட்டுச் சாப்பாட்டை ரொம்பவே, மிஸ் பண்ணுவேன். சென்னைக்கு வந்தால், கட்டாயம், பொங்கலை விரும்பிச் சாப்பிடுவேன்.

மைனா அமலாபால், இப்போது கிளாமருக்கு மாறியது ஏன்?

எல்லாருமே, மைனாவைத் தான், மனதில் வச்சிருப்பாங்க. அந்தகேரக்டருக்காக, நான், மைனாவாகவே மாறி விட்டேன். ஆனால், என்னுடைய திரை வாழ்வில், தற்போதைய காலத்தை, சிறந்த காலமாக கருதுகிறேன். உடலை கட்டுக் கோப்பாக வைக்க, உடற்பயிற்சி, யோகா செய்கிறேன். யோகா இல்லாமல், என்னால், சந்தோஷமாக இருக்க முடியாது.

படப்பிடிப்பில் உங்கள் செயல்பாடு?

ஓர் உதவி இயக்குனரைப் போல், எல்லா வேலைகளையும் தெரிஞ்சுக்க ஆசைப்படுவேன். கதை, எடிட்டிங், இயக்கம் என, எல்லா வேலைகளையும் கவனிப்பேன். விரைவில், ஓர் இசை ஆல்பம் வெளியிடும் ஐடியாவும் இருக்கு.

அரவிந்த் சாமியுடன் நடிக்கும் பாஸ்கர் ஒரு ராஸ்கல் படம் பற்றி?

எனக்கு, சமீபத்தில் கிடைத்த நல்ல நண்பர் அரவிந்த்சாமி. நிறைய விஷயங்களை அவருடன், டிஸ்கஸ் பண்ணுவேன். பாஸ்கர் ஒரு ராஸ்கல் ஒரு ஜாலியான படம். இந்த படத்தில், ஒரு குழந்தைக்கு அம்மாவாக நடித்திருக்கிறேன்.

சிகரெட் பிடித்த வீடியோ உண்மையா?

நான் வெளியூரில் இருக்கும்போது, இதுபற்றி எனக்கு தகவல் கிடைத்தது. ஒரு மலையாள படத்தில், சிகரெட் பிடிப்பது போன்ற காட்சி இருந்தது. அதை எடுத்துப் போட்டு, ஏதேதோ மாற்றங்கள் செய்து, அதை வைரலாக்கிட்டாங்க. கோபம் கோபமாக வந்தது. ஆனால், என்ன செய்ய முடியும்?

பெண்களை மையப்படுத்தி வரும் கதைகள் வெற்றி பெறுகின்றனவே?

நல்ல விஷயம் தானே. சமீபத்தில் வந்த அறம் படத்தை, எல்லாரும் பாராட்டுகின்றனர். நான் கூட, இந்த மாதிரி சமூக பிரச்னையை மையமாக வைத்து, அதே அந்த பறவை என்ற தலைப்பில் ஒரு படத்தில் நடிக்கிறேன்.

கார் விஷயத்தில் என்ன தான் நடந்தது?

அது என்னவோ, நான் யார்கிட்ட கார் விஷயத்தை சொன்னாலும், அது வேறு விதமாக செய்தியாகிறது. அதனால் தான், சமூக வலைதளங்களில் எல்லாருக்கும் செய்தி அனுப்பியுள்ளேன். நேரம் வரும்போது, இதுபற்றி நிறைய பேசுவேன்.