சினிமா செய்தித் துளிகள்
புதிய தோற்றத்துடன் சமந்தா
02 Apr,2016
ஹன்சிகாவை பார்த்து பொறாமைபடுகிறேன்: ஜெயப்பிரதா
முன்னாள் கனவு கன்னி ஜெயபிரதா தயாரிப்பில் அவரது மகன் சித்து நடித்துள்ள படம் உயிரே உயிரே. ஹன்சிகா அவருக்கு ஜோடியாக நடித்துள்ளார்.
இது இஷ்க் என்ற தெலுங்கு படத்தின் ரீமேக். ராஜசேகர் இயக்கியுள்ளார். ஆர்.டி.ராஜசேகர் ஒளிப்பதிவு செய்துள்ளார். அனுப்ரூபன் இசை அமைத்துள்ளார். விரைவில் படம் வெளிவர உள்ளது. தனது மகன் சித்துவை மீடியாக்களுக்கு அறிமுகப்படுத்தி ஜெயப்பிரதா பேசியதாவது:
நான் எத்தனை படத்தில் நடித்திருந்தாலும் இந்தப் படம் எனது வாழ்க்கையில் மறக்க முடியாத படம். எங்களது புரொடக்சன் கம்பெனியில் பல்வேறு மொழிகளில் நாங்கள் படங்கள் தயாரித்துள்ளோம். இந்தப்படம் மூலம் தமிழ் திரையுலகிற்கு எனது மகன் சித்துவை கதாநாயகனாக அறிமுகப்படுத்துகிறோம். எனக்கு தமிழ் ரசிகர்கள் அளித்த வரவேற்பு வேறு எங்கும் கிடைக்காதது. என்னுடைய குடும்பத்திலிருந்து ஒருவர் இந்தத் துறைக்கு வந்தால் அது தமிழில் இருந்து தான் தொடங்கவேண்டும் என்பது என் கனவு. இந்தப் படம் மூலமாக அது நிறைவேறியுள்ளது.
லெஜண்ட்ரி இயக்குநர் சத்யஜித்ரே என்னிடம், நடிகைகளிலேயே நான் மிக அழகான பெண் என்று கூறுவார். ஆனால் இந்தப் படத்தில் பாடலாசிரியர் விவேகா ஹன்சிகாவை அழகே அழகேஎன வர்ணித்தது எனக்கு சற்று பொறாமையாகத் தானிருந்தது. அதற்கேற்ப ஹன்சிகாவும் அழகாக இருக்கிறார். என் இளவயது நினைவுகளை தூண்டுகிறவராக இருக்கிறார். ஹன்சிகாவின் நடிப்பு இந்தப் படத்தின் மூலம் இன்னும் மெருகேறியுள்ளது. அவர் இன்னும் பெரிய இடத்துக்கு வருவார். இந்தப் படத்தில் நடிக்க கேட்டபோது புதுமுகம் என்றும் பாராமல் என் மகனுடன் நடிக்க ஒப்புக் கொண்டார். இந்த படத்தில் நான் ஒரு பாடலையும் பாடியுள்ளேன். எனக்கு ஆதரவு தந்ததைப்போலவே என் மகனுக்கும் தமிழக மக்கள் ஆதரவு தருவார்கள் என்று நம்புகிறேன்.
இவ்வாறு ஜெயப்பிரதா கூறினார்.
புதிய தோற்றத்துடன் சமந்தா
தமிழ், தெலுங்கு என பிசியாக நடித்துக் கொண்டிருக்கும் சமந்தா அண்மையில் அ.ஆ எனும் தெலுங்கு படத்தின் படப்பிடிப்பை முடித்தார். மகேஷ்
பாபுவின் பிரம்மோற்சவம் படத்தில் நடித்து வரும் சமந்தா அடுத்ததாக ஜுனியர் என்.டி.ஆரின் ஜனதா கேரேஜ் படத்தில் நடிக்கவுள்ளார். இப்படத்திற்காக தனது சிகை அலங்காரத்தை மாற்றியுள்ள சமந்தா, புதிய தோற்றத்துடன் புகைப்படம் எடுத்து அதனை டுவிட்டரில் பகிர்ந்துள்ளார். நீளமான தனது கூந்தலை சற்று அதிகமாக கத்தரித்துள்ள சமந்தா, தற்போது குழந்தையைப் போல் உணர்வதாகவும் கூறியுள்ளார். இயக்குனர் கொரடலா சிவா இயக்கும் ஜனதா கேரேஜ் படத்தில் சமந்தாவுடன் நித்யா மேனனும் நாயகியாக நடிக்கின்றார்
தோழாவுக்கு பிரான்ஸ் பட நிறுவனம் பாராட்டு
சமீபத்தில் வெளியாகி மக்களின் ஏகோபித்த வரவேற்புடன் ஓடிக் கொண்டிருக்கும் படம் தோழா. நாகர்ஜூனா, கார்த்தி, தமன்னா, பிரகாஷ்ராஜ்
நடித்துள்ளனர். வம்சி படையபள்ளி இயக்கி உள்ளார். இந்த படம் 2011ம் ஆண்டு பிரான்சில் வெளிவந்த 'தி இன்டச்சபிள்' என்ற படத்தின் ரீமேக். பிவிபி சினிமா முறைப்படி உரிமம் பெற்று தயாரித்துள்ளது.
உலக புகழ்பெற்ற இந்தப் படத்தின் ரீமேக் தமிழிலும் வெற்றி பெற்றிருப்பது படத்தை தயாரித்த பிரான்சு நிறுவனமான கவுமண்ட் சினிமாவை மகிழ்ச்சியில் ஆழ்த்தியுள்ளது. படத்தின் வெற்றிக்கு அது தனது வாழ்த்துக்களை தெரிவித்துள்ளது. 120 ஆண்டு பாரம்பரியம் மிக்க இந்த நிறுவனம். தி இன்டச்சபிள் படத்தை தங்களது பெருமைமிகு தயாரிப்பாக முன்னர் அறிவித்தது. இப்போது அது தோழாவையும் பாராட்டி உள்ளது. இதுகுறித்து தனது மகிழ்ச்சியை தெரிவித்துள்ள பிவிபி சினிமா ரீமேக் உரிமம் பெற்றுத் தந்த குநீத் மோங்காவுக்கும் தனது நன்றியை தெரிவித்துக் கொண்டுள்ளது
நயன்தாராவை வீடு புகுந்து தாக்கிய மர்ம நபர்கள்.?!
சில தினங்களுக்கு முன்னர் நடிகை நயன்தாரா வீட்டில் மர்ம நபர்கள் சிலர் புகுந்து, அவரை கடுமையாக தாக்கியதாகவும், இதில் அவரது கண், கை மற்றும் காலில் அடிப்பட்டதாகவும் தகவல் வெளியாகியுள்ளது.
ஹரி இயக்கிய 'ஐயா' படத்தின் மூலம் தமிழ் சினிமாவில் ஹீரோயினாக அறிமுகமானவர் நயன்தாரா. அதனையடுத்து ரஜினி, விஜய், அஜித், சூர்யா என முன்னணி நடிகர்களுடன் நடித்து நம்பர்-1 நடிகையாக உயர்ந்தார். இடையில் சிம்புவுடன் காதல் வலையில் சிக்கினார். அதன்பின்னர் இயக்குநர் பிரபுதேவாவை காதலித்து, அவருக்காக மதம் எல்லாம் மாறினார். பிரபுதேவாவும் தான் காதலித்து மணந்த முதல் மனைவியை விவாகரத்து எல்லாம் செய்தார். இருவரும் திருமணம் செய்ய இருந்த வேளையில் திடீரென அந்தக்காதல் முறி்ந்து போனது.
பின்னர் மீண்டும் சினிமாவில் தனது இரண்டாவது இன்னிங்கிஸை ஆரம்பித்த நயன்தாரா, ராஜா ராணி படத்தின் மூலம் ரீ-என்ட்ரியானார். தொடர்ந்து பல படங்களில் நடித்தார், கடந்தாண்டு இவரது நடிப்பில் வெளியான படங்களில் மூன்று படங்கள் தொடர் ஹிட்டாக, மீண்டும் இழந்த சினிமார்க்கெட்டை பிடித்து இப்போது நம்பர்-1 அரியணையில் ஏறியிருக்கிறார். கூடவே இன்னொரு காதல் கிசுகிசுவிலும் சிக்கியிருக்கிறார். 'நானும் ரவுடிதான்' படத்தை இயக்கிய விக்னேஷ் சிவனை தற்போது நயன்தாரா காதலிப்பதாக கூறப்படுகிறது. இதுதொடர்பாக நிறைய செய்திகள் வந்துள்ளது, வந்து கொண்டும் இருக்கிறது. இருவரும் நெருக்கமாக இருக்கும் புகைப்படங்களும் வெளியாகின.
தற்போது நயன்தாரா கோயம்பேடு அருகே பிளாட் ஒன்றை வாங்கி அங்கு குடியேறி உள்ளார். இந்நிலையில் சில தினங்களுக்கு முன்னர் நயன்தாராவிடம் ஒரு பெரிய நிறுவனத்தில் இருந்து வருகிறோம் என்று கூறி மர்ம நபர்கள் சிலர் நயன்தாராவின் வீட்டிற்குள் புகுந்ததாகவும், பின்னர் அவர்கள் நயன்தாராவை சரமாரியாக தாக்கியதாகவும், இதில் அவரது கண், கை, காலில் பலத்த காயம் ஏற்பட்டுள்ளதாகவும், தற்போது அவர் வீட்டிற்குள்ளேயே சிகிச்சை பெற்று வருவதாகவும், தனியாக நடக்க முடியாமல் வாக்கிங் ஸ்டிக் வைத்து நடப்பதாகவும் உறுதிப்படுத்தப்படாத தகவல்கள் தெரிவிக்கின்றன.
நயன்தாராவை தாக்கியவர்கள் யார் என்று தெரியவில்லை. பழைய பகை அல்லது பழைய காதல் பகை காரணமாக யாரேனும் தாக்கியிருக்கலாம் என்று கூறப்படுகிறது. மேலும் இதுதொடர்பாக நயன்தாரா, போலீசிலும் புகார் அளிக்கவில்லையாம்.
நயன்தாரா தாக்கப்பட்டார் என்ற இந்த செய்தி இணையங்களில் வைரலாக பரவி வருகிறது.
இறங்கி வருகிறார் ஹன்சிகா!
தனுஷ் நடித்த மாப்பிள்ளை படத்தில் தமிழுக்கு வந்தவர் மும்பை நடிகை ஹன்சிகா. அதையடுத்து, ஜெயம்ரவியின் எங்கேயும் காதல், விஜய்யின்
வேலாயுதம் என அடுத்தடுத்து முன்னணி ஹீரோக்களின் படங்களாக நடித்து வந்த வேகத்திலேயே தமிழில் மார்க்கெட்டை பிடித்தார் ஹன்சிகா. அந்த வகையில் கடந்த 6 ஆண்டுகளாக முன்னணி ஹீரோக்களின் படங்களாக நடித்து வந்த ஹன்சிகா, முதன்முறையாக உயிரே உயிரே படத்தில் ஜெயப்பிரதாவின் மகன் சித்துவுக்கு ஜோடியாக நடித்துள்ளார். இதன்பிறகு ஜெயம்ரவியுடன் போகன், உதயநிதியுடன் மனிதன் போன்ற படங்களிலும் நடித்து வருகிறார்.
இந்த நிலையில், அடுத்தபடியாக முன்னணி ஹீரோக்களின் படங்கள் ஹன்சிகா பக்கம் திரும்புவதாக தெரியவில்லை. அதனால் முன்னணி ஹீரோக்களின் படங்களுக்காக வெயிட் பண்ணிக்கொண்டிருந்தால் இருக்கிற மார்க்கெட்டும் சரிந்து விடும் என்பதால், உயிரே உயிரே படத்தைத் தொடர்ந்து நல்ல வேடம் கிடைத்தால் இளம் ஹீரோக்களுடனும் நடிப்பேன் என்று ஹன்சிகா ஒரு செய்தியை கோலிவுட்டில் வெளியிட்டிருப்பதாக ஒரு தகவல் . அதோடு, பட்ஜெட்டுகளுக்கேற்ப சம்பளத்தையும் குறைக்கவும் தயாராகியிருக்கிறாராம் ஹன்சிகா