குண்டு பெண்ணாக நடித்தது ஏன்?: அனுஷ்கா

கதாநாயகர்கள்தான் கதைக்குத் தகுந்தபடி தங்கள் உடல் எடையை கூட்டிக் குறைப்பார்கள்.

நாயகிகள் எடை அதிகரித்து விடக்கூடாது என்பதில் கவனமாக இருப்பார்கள். குண்டானால் சினிமா சான்ஸ் போய் விடும் என்று வருத்தப்படுவார்கள். ஆனால் ஆர்யாவுடன் அனுஷ்கா ‘இஞ்சி இடுப்பழகி’ படத்தில் குண்டுப் பெண்ணாக நடிப்பதற்காக உடல் எடையை 20 கிலோ அதிகரித்துக்கொண்டார்.

‘யோகா’ ஆசிரியரான எனக்கு உடல் எடை அதிகரிப்பது, குறைப்பது எல்லாம் சர்வ சாதாரணம் என்றார். ‘பாகுபலி–2’ படத்தில் நடிக்க வேண்டி இருப்பதால் உடல் எடையை வேகமாக குறைக்க வேண்டியுள்ளது. எனவே அமெரிக்காவில் சிகிச்சை பெறுகிறார் என்றெல்லாம் பல்வேறு தகவல்கள் வெளியாகின. இப்போது உடல் எடையை துணிச்சலாக அதிகரித்தது ஏன் என்ற காரணத்தை அனுஷ்கா தெரிவித்துள்ளார்.

இதுபற்றி அவர் கூறியதாவது:–

ஒவ்வொரு பெண்ணும் குண்டாக இருக்கிறோமே, ஒல்லியாக இருக்கிறோமே என்று கவலைப்பட வேண்டாம். அழகு என்பது உடலில் அல்ல. மனதில்தான் இருக்கிறது. எனவே அழகாக இல்லை என்று எந்த பெண்ணும் கவலைப்பட வேண்டியதே இல்லை. சின்ன வயதில் என்னை பலர் அழகாக இருப்பதாக சொல்லி இருக்கிறார்கள். வளர்ந்த பிறகும் அதையேதான் சொல்லுகிறார்கள்.

எனவே என்னை எல்லோரும் வித்தியாசமாக பார்க்க வேண்டும் என்ற எண்ணம் எனக்குள் இருந்தது. இதனால்தான் டைரக்டர் கதை சொல்லி நீங்கள் குண்டாக நடிக்க வேண்டியது இருக்கும் என்றதும் நான் சம்மதித்தேன். அதற்காக நிறைய சாப்பிட்டு உடல் எடையை அதிகரித்தேன். அது வித்தியாசமாக இருந்தது. இப்போது பழைய நிலைக்கு திரும்பிக் கொண்டிருக்கிறேன் என்றார்.

இந்தி படம் தோல்வி ஐஸ்வர்யாராய்க்கு ரூ.3 கோடி நஷ்டம்

நடிகை ஐஸ்வர்யாராய், இந்தி நடிகர் அபிஷேக் பச்சனை மணந்து குடும்பம், குழந்தை என்று இருந்ததால் சினிமாவை விட்டு தற்காலிகமாக ஒதுங்கினார். 3 வருடங்களாக படங்களில் நடிக்கவில்லை. சில மாதங்களுக்கு முன், திடீரென மீண்டும் நடிக்க வந்தார்.

‘ஜாஷ்பா’ என்ற இந்தி படத்தில் நடிக்க அவர் ஒப்பந்தம் செய்யப்பட்டார். இது, இந்தியா முழுவதும் பரபரப்பாக பேசப்பட்டது. இந்த படத்துக்கு பலத்த எதிர்பார்ப்பும் ஏற்பட்டது. இந்த படத்தில் நடிக்க ஐஸ்வர்யாராய்க்கு 4 கோடி ரூபாய் சம்பளம் பேசப்பட்டது. அதில் ரூ.1 கோடி முன் பணமாக கொடுக்கப்பட்டது. மீதி, 3 கோடி ரூபாயும் படம் வெளியாகும் போது தரப்படும் என்று உறுதி அளிக்கப்பட்டது.

ஆனால் அந்த பணம் படம் முடிந்த பிறகும் அவருக்கு கொடுக்கப்படவில்லை என்று கூறப்படுகிறது. இதனால் படத்தை விளம்பரப்படுத்தும் நிகழ்ச்சிகளில் பங்கேற்காமல் ஐஸ்வர்யாராய் புறக்கணித்தார். இதைத்தொடர்ந்து சமரச பேச்சுவார்த்தைகள் நடந்தன. படம் வெளியான பின்பு லாபத்தில் ஐஸ்வர்யாராய்க்கு பங்கு தரப்படும் என்று கூறப்பட்டது.

இதனை அவர் ஏற்றுக்கொண்டார். ஆனால் படம் வெளியாகி எதிர்பார்த்தபடி ஓடவில்லை. நஷ்டம் ஏற்பட்டுள்ளது. இதனால் ஐஸ்வர்யாராய் தனக்கு வரவேண்டிய ரூ.3 கோடி பணத்தை இழந்து இருக்கிறார். இது அவருக்கு வருத்தத்தை ஏற்படுத்தி உள்ளது.

அனுஷ்கா படத்தில் ஹன்சிகா

ஆர்யா- அனுஷ்கா நடிப்பில் தற்போது உருவாகியுள்ள படம் ‘இஞ்சி இடுப்பழகி’. இப்படத்தை கே.எஸ்.பிரகாஷ் இயக்கியுள்ளார். பிவிபி நிறுவனம் இப்படத்தை பிரம்மாண்டமாக தயாரித்திருக்கிறது. மரகதமணி இசையமைக்கும் இப்படத்திற்கு நீரவ்ஷா ஒளிப்பதிவு செய்துள்ளார். இப்படம் தெலுங்கில் 'சைஸ் ஜீரோ' என்னும் பெயரில் உருவாகியுள்ளது.

தெலுங்கில் தயாராகியுள்ள இப்படத்தில் நாகார்ஜூனா கௌரவ வேடத்தில் நடித்துள்ளார். தமிழில் யாரை கௌரவ வேடத்தில் நடிக்க வைக்கலாம் என யோசித்த போது, ஜீவாவை நடிக்க வைக்கலாம் என இயக்குனருக்கு ஆர்யா சிபாரிசு செய்துள்ளதாக தகவல்கள் வெளியாகியுள்ளது.

இவர்களை தொடர்ந்து ஹன்சிகாவும் இப்படத்தில் கௌரவ வேடத்தில் நடித்திருக்கிறார். ‘இஞ்சி இடுப்பழகி’ படத்தின் கிளைமாக்சில் இடம்பெறும் முக்கியமான காட்சியில் ஹன்சிகா நடித்திருப்பதாக கூறப்படுகிறது.

‘இஞ்சி இடுப்பழகி’ படத்தின் இசை சமீபத்தில் வெளியானது. இப்படம் நவம்பர் 27-ம் தேதி திரைக்கு வர இருக்கிறது.

விஜய்யுடன் படப்பிடிப்பில் கலந்துக் கொண்ட எமி ஜாக்சன்

புலி படத்திற்குப் பிறகு விஜய் தற்போது அட்லி இயக்கத்தில் நடித்து வருகிறார். இதில் விஜய்க்கு ஜோடியாக எமி ஜாக்சன் மற்றும் சமந்தா நடிக்கிறார்கள். இப்படத்தின் படப்பிடிப்பு தற்போது விறுவிறுப்பாக நடந்து வருகிறது. இப்படத்தில் விஜய் போலீஸ் கதாபாத்திரத்தில் நடிக்கிறார். இப்படத்திற்கு ‘காக்கி’ என தலைப்பு வைக்க இருப்பதாக கூறப்படுகிறது.

சமீபத்தில் இப்படத்தின் சண்டைக்காட்சி ஒன்று படமாக்கப்பட்டது. இது சமூக வலைத்தளங்களில் வெளியாகி வேகமாக பரவி வருகிறது. விஜய் சம்மந்தப்பட்ட காட்சிகளை படமாக்கி வந்த அட்லி, தற்போது எமிஜாக்சன் சம்மந்தப்பட்ட காட்சிகளை படமாக்கியிருக்கிறார். இதற்காக விஜய் படத்தின் முதல் நாள் படப்பிடிப்பில் இன்று கலந்து கொண்டேன் என்று எமிஜாக்சன் கூறியிருக்கிறார்.

கலைப்புலி தாணு தயாரிக்கும் இப்படத்திற்கு ஜி.வி. பிரகாஷ் இசையமைத்து வருகிறார். இவருடைய இசையில் விஜய் ‘செல்லாக்குட்டி’ என்ற பாடலை விஜய் பாடியிருக்கிறார். இதற்கான ரெக்கார்டிங் சமீபத்தில் நடந்தது.