வட ஆப்பிரிக்காவில் அமைந்துள்ள ஸ்பெயின் நாட்டின் பிராந்தியமான செவுட்டாவில்அகதிகள் தங்கியிருந்த முகாமிற்கு உள்ளூர் போராட்டக்காரர்கள் தீவைத்த சம்பவம் பெரும் வன்முறையாக மாறியுள்ளது. மொராக்கோவில் இருந்து பல்லாயிரக்கணக்கான சட்டவிரோதக் குடியேறிகள் ஒரே நேரத்தில் ஊடுருவியதால் எழுந்த பதற்றம், தற்போது உள்ளூர் மக்களுக்கும் அகதிகளுக்கும் இடையே நேரடி மோதலாக வெடித்துள்ளது.
கடந்த ஜூலை மாத இறுதியில் மொராக்கோ எல்லை வழியாக சுமார் 70,000-க்கும் மேற்பட்ட அகதிகள் கடல் வழியிலும் தரைவழியிலும் செவுட்டாவிற்குள் புகுந்தனர். பெரும்பாலானோர் திரும்ப அனுப்பப்பட்ட போதிலும், சுமார் 7,000 முதல் 10,000 வரையிலான அகதிகள் இன்னமும் கடற்கரைகள் மற்றும் தெருக்களில் முகாம்கள் அமைத்துத் தங்கி வருகின்றனர். இதனால் தங்களது நகரம் பாதுகாப்பற்றதாக மாறிவிட்டதாகக் கூறி, ஸ்பெயின் கொடிகளுடன் தெருவில் இறங்கிய உள்ளூர்வாசிகள், அகதிகளை உடனடியாகத் வெளியேற்றக் கோரிப் போராட்டத்தைத் தொடங்கினர்.
போராட்டம் தீவிரமடைந்த நிலையைத் தொடர்ந்து, பெனிடெஸ் கடற்கரையில் அகதிகள் அமைத்திருந்த தற்காலிகக் கூடாரங்களைச் சூழ்ந்த போராட்டக்காரர்கள், அவற்றிற்குத் தீவைத்து பொருட்களையும் கடலுக்குள் வீசி எறிந்தனர். மேலும், அகதிகளுக்கு உணவு மற்றும் மருத்துவ உதவி வழங்க வந்த செஞ்சிலுவைச் சங்கத்தின்வாகனங்களையும் தடுத்து நிறுத்தித் தாக்குதலில் ஈடுபட்டனர். கலவரத்தைக் கட்டுப்படுத்தக் காவல் துறையினர் ரப்பர் குண்டுகள் மற்றும் கண்ணீர்ப்புகைக் குண்டுகளைப் பயன்படுத்திப் போராட்டக்காரர்களைக் கலைத்தனர்.
இந்தச் சம்பவத்தால் ஸ்பெயினின் பெட்ரோ சான்செஸ் தலைமையிலான அரசுக்குக் கடும் அரசியல் நெருக்கடி ஏற்பட்டுள்ளது. எதிர்கட்சிகள் பிரதமர்மீது கடுமையான விமர்சனங்களை முன்வைத்து வரும் நிலையில், அகதிகளை அடையாளங்கண்டு விரைவாக மொராக்கோவிற்குத் திருப்பி அனுப்பும் நடவடிக்கைகளைச் ஸ்பெயின் அரசு தீவிரப்படுத்தியுள்ளது. இருப்பினும், ஆயிரக்கணக்கான ஆதரவற்ற சிறுவர்கள் உள்ளதால் அவர்களை சட்டரீதியாகத் திருப்பி அனுப்புவதில் தாமதம் ஏற்பட்டு வருகிறது.
