உக்ரைன் மற்றும் ரஷ்யா இடையேயான போர் நாளுக்கு நாள் தீவிரமடைந்து வரும் நிலையில், ரஷ்யாவின் கடல்சார் விநியோகக் கட்டமைப்பைக் குறிவைத்து உக்ரைன் ராணுவம் புதியதொரு அதிரடித் தாக்குதலை நடத்தியுள்ளது. ரஷ்யாவால் ஆக்கிரமிக்கப்பட்ட கிரிமியா தீபகற்பத்திற்கு எரிபொருளைக் கொண்டு செல்லும் ரஷ்யாவின் ‘ஷேடோ பிளீட்’ (Shadow Fleet) எனப்படும் நிழல் உலகக் கப்பல் படையைச் சேர்ந்த 8 எரிபொருள் டாங்கர் கப்பல்களை உக்ரைனின் அதிநவீன ட்ரோன் படைகள் ஒரே இரவில் தாக்கி அழித்துள்ளன. அசோவ் கடல் (Sea of Azov) பகுதியில் அரங்கேறிய இந்த வான்-கடல் கூட்டுத் தாக்குதல், ரஷ்ய ராணுவத்தின் எரிபொருள் விநியோகச் சங்கிலியைப் பெருமளவில் முடக்கியுள்ளதாக உக்ரைன் பாதுகாப்புப் படை அதிகாரப்பூர்வமாகத் தெரிவித்துள்ளது.
சர்வதேச அளவில் பல்வேறு கடுமையான பொருளாதார மற்றும் வர்த்தகத் தடைகளை எதிர்கொண்டுள்ள ரஷ்யா, கிரிமியாவிற்குள் இருக்கும் தனது ராணுவப் பயன்பாட்டிற்காக இந்த ஷேடோ பிளீட் கப்பல்களைப் பயன்படுத்தி வந்தது. தாக்குதலுக்குள்ளான இந்த 8 டாங்கர் கப்பல்களும் தலா 7,000 டன் எடையைச் சுமந்து செல்லும் திறன் கொண்டவை என்றும், இவை சுமார் 140 மீட்டர் நீளமுடையவை என்றும் உக்ரைனின் ஆளில்லா விமானப் பிரிவுத் தளபதி ராபர்ட் ப்ரோவ்டி (Robert Brovdi) தெரிவித்துள்ளார். ‘கைரோஸ்’ (Kairos) என்ற சிறப்பு ட்ரோன் பிரிவினர் மேற்கொண்ட இந்த துல்லியமான வேட்டையில், வெனெரா-3, சனார்-1, சனார்-17, கிளிமினா உள்ளிட்ட 7 கப்பல்கள் அடையாளம் காணப்பட்டுள்ளதுடன், எட்டாவது கப்பலை அடையாளம் காணும் பணிகள் நடந்து வருகின்றன.
இந்த ட்ரோன் தாக்குதலின் காரணமாக டாங்கர் கப்பல்கள் தீப்பற்றி எரிந்ததற்கான கருப்பு-வெள்ளைப் புகைப்பட ஆதாரங்களையும், வீடியோ காட்சிகளையும் உக்ரைன் ராணுவம் டெலிகிராம் மற்றும் எக்ஸ் வலைத்தளங்களில் வெளியிட்டுள்ளது. கிரிமியாவுக்குத் தேவையான பெட்ரோலியப் பொருட்களை எடுத்துச் செல்லும் முதன்மைப் பாதையான அசோவ்-கிரிமியா வழித்தடத்தில் இந்தத் தாக்குதல் நடத்தப்பட்டுள்ளது. முழு கொள்ளளவுடன் செல்லும் இந்த 8 கப்பல்களும் சுமார் 40,000 முதல் 50,000 டன் வரையிலான எரிபொருளைக் கொண்டு செல்லக்கூடியவை என்பதால், இந்தத் தாக்குதல் ரஷ்ய ராணுவத்திற்குப் பெரும் பொருளாதார மற்றும் தளவாட இழப்பை ஏற்படுத்தியுள்ளதாக சர்வதேச ராணுவப் பகுப்பாய்வாளர்கள் கருதுகின்றனர்.
சமீப வாரங்களாக கிரிமியா தீபகற்பத்தில் உள்ள ரஷ்யாவின் எரிசக்தி மற்றும் விநியோகக் உள்கட்டமைப்புகளை உக்ரைன் தொடர்ந்து குறிவைத்து வருகிறது. இதன் காரணமாக கிரிமியாவின் பல பகுதிகளில் கடுமையான எரிபொருள் பற்றாக்குறை ஏற்பட்டு, அங்கு அவசரநிலைப் பிரகடனம் செய்யப்பட்டுள்ள சூழலில் இந்தத் தாக்குதல் நிகழ்ந்துள்ளது. கடல்சார் தளவாடங்களை முடக்குவதன் மூலம் கிரிமியாவில் முகாமிட்டுள்ள ரஷ்யப் படைகளுக்கான வெடிபொருட்கள் மற்றும் எரிபொருள் விநியோகத்தைத் தடுத்து, அவர்களைத் தனிமைப்படுத்துவதே தங்களின் முக்கிய நோக்கம் என்று உக்ரைன் ராணுவம் தெளிவுபடுத்தியுள்ளது. உக்ரைனின் இந்த அடுத்தடுத்த அதிரடி நடவடிக்கைகள் போரின் போக்கை மேலும் சுவாரசியமாக்கியுள்ளன.
